Lagerbäck: Öfunda ekki Portúgal

Það var létt yfir Lars Lagerbäck í sumarhitanum í Annecy í gær en íslenska landsliðið hafði þá nýlokið æfingu sinni á æfingasvæðinu í bænum.

Þar með hófst formlegur undirbúningur íslenska liðsins fyrir leikinn gegn Englandi í 16-liða úrslitunum á EM á mánudag. Það sæti var tryggt eftir 2-1 sigur á Austurríki á Stade de France í gær.

„Þetta var skref fram á við,“ sagði Lagerbäck um leikinn í gær. „Það sem við höfum gert vel allt mótið var áfram got thjá okkur og hvað sóknarleikinn varðar þá var framför í honum hjá okkur.“

Sjá einnig: Heimir: Menn voru bara að missa sig

Hann segir að leikurinn hafi byrjað vel en þegar strákarnir hafi komist yfir hafi liðið fallið í of djúpan varnarleik.

„Þá varð erfitt fyrir okkur að halda boltanu. En þær skiptingar sem við gerðum komu með meiri kraft og þeir leikmenn voru klókir. Ég verð þó að hrósa öllum leikmönnum okkar. Þeir stóðu sig virkilega vel allan leikinn.“

Austurríki stillti upp með þriggja manna vörn í upphafi leiks sem kom mörgum á óvart. Ísland komst þá yfir og Marcel Koller, landsliðsþjálfari Austurríkis, breytti í 4-3-3 í seinni hálfleik.

Það bar góðan árangur þar sem að Austurríki spilaði sinn besta hálfleik á mótinu, náði að jafna metin og setja mikla pressu á íslensku vörnina.

Sjá einnig: Lars: „Ég er kominn heim“ hitti mig beint í hjartastað

„Sú breyting sem gerð var í hálfleik kom mér ekki á óvart. Það getur allt gerst í fótbolta og þeir urðu að sækja annað mark. Enda kom meiri kraftur í sóknina hjá þeim.“

Sigurmark Arnór Ingva Traustasonar í lokin þýðir að Ísland mætir Englandi í 16-liða úrslitunum og spilar ekki fyrr en á mánudag. Til samanburðar má nefna að Portúgal, sem hafnaði í þriðja sæti F-riðils, spilar við Króatíu á laugardag.

„Ég öfunda Portúgal alls ekki. Það er í raun ekki hægt að meta hversu dýrmætt það er að fá auka tvo daga í hvíld. Það var gríðarlega mikilvægt fyrir okkur.“

Lagerbäck var mikið spurður af erlendum fjölmiðlamönnum um íslenska ævintýrið og hversu langt Ísland getur farið á mótinu.

„Það er erfitt að segja. Þetta er sama klisjan og alltaf. Nú einbeitum við okkur að Englandi og leikmenn fara í endurheimt. En við munum reyna að vinna leikinn. Ég hef alltaf sagt að það sé raunhæfur möguleiki að vinna hvern sem er. Hversu stór hann er veit svo enginn.“

„Englendingar eru með gott lið og miðað við það sem ég hef séð af þeim hafa þeir helst verið í vandræðum með að nýta færin sín.“

Og hann er viss um að íslenska landsliðið getur valdið því enska vandræðum. „Hversu miklum verður bara að koma í ljós. Við munum allavega reyna.“

Ekki missa af neinu sem gerist á EM í Frakklandi. Vísir er með hóp fjölmiðlamanna á mótinu sem færa ykkur allar nýjustu fréttirnar af strákunum okkar. Fylgdu okkur á Facebook, Twitter og Snapchat (sport365).