Minnst 50 látnir í sprengjuárás ISIS í Sýrlandi

Minnst 50 eru látnir eftir sprengjuárás Íslamska ríkisins í Qamishli í Sýrlandi. Borgin er í norðurhluta landsins og er í höndum Kúrda. Líklegt þykir að tala látinna muni hækka. Um er að ræða tvær sprengingar á sama stað með nokkurra mínútna millibili.

Fyrst var flutningabíll sprengdur í loft upp og nokkrum mínútum síðar var mótorhjól hlaðið sprengiefnum sprengt á sama stað.

Samkvæmt Al-Jazeera var skotmark árásarinnar höfuðstöðvar lögreglu Kúrda í borginni og nærliggjandi opinber bygging.

Styrjöldin í Sýrlandi hefur nú staðið yfir í á sjötta ár. Syrian Observatory for Human Rights áætla að um 280 þúsund manns hafi látið lífið á þeim tíma.

Um 4,8 milljónir manna hafa flúið Sýrlandi, en þar að auki er talið að rúmlega 6,5 milljónir hafi þurft að flýja heimili sín innan Sýrlands.