Í Ríó græða Airbnb- salar þrjá milljarða

Vegna Ólympíuleikanna í Ríó hefur eftirspurn eftir hótelum og húsnæði margfaldast. Fjöldi skráðra íbúða á Airbnb í borginni er nú tvöfalt meiri en fyrir tveimur árum. Tæplega 40 þúsund íbúðir eru skráðar í borginni og áætla forsvarsmenn Airbnb að gestgjafarnir muni hagnast um 25 milljónir dollara, jafnvirði þriggja milljarða íslenskra króna, meðan Ólympíuleikarnir standa yfir frá 5. til 21. ágúst.

CNN greinir frá því að hótelherbergi á vinsælum svæðum, til að mynda Copacobana og Ipanema-strönd, hafi snarhækkað yfir tímabilið og kosti allt að sjötíu þúsund krónur nóttin.

Talið er að 66 þúsund gestir muni gista í Airbnb-íbúðum á meðan á Ólympíuleikunum stendur. Helmingur þeirra er erlendir gestir og helmingurinn innlendir, og gista þeir að meðaltali í sex nætur.

Efnahagsástandið hefur verið erfitt í Brasilíu og er kreppa í landinu, því nýta margir Brasilíubúar sér Airbnb fyrir aukatekjur. Einnig eru margir sem hafa hækkað verðið yfir tímabilið, en gisting í Ríó er nú sú dýrasta að meðaltali af öllum Airbnb-borgum í heimi.