Fyrrum kosningastjóri Obama segir Trump vera siðblindan

David Plouffe, fyrrum ráðgjafi og kosningastjóri Obama bandaríkjaforseta, telur Donald Trump vera siðblindann. Hann segir forsetaefni repúblikana mæta læknisfræðilegri skilgreiningu persónuleikaröskunarinnar. Reuters greinir frá.

„Í rauninni er siðblindingi í forsetaframboði, hann mætir læknisfræðilegu skilgreiningunni,“ sagði Plouffe í viðtali í þættinum Meet the Press á NBC.

Plouffe viðurkenndi að hann hefði enga gráðu í sálfræði en taldi upp það sem hann sagði vera nokkur af einkennum Trump: „gífurlegt ofmat á eigin verðleikum, sjúklegar lygar, skortur á samkennd og skortur á iðrun.“ 

Obama hefur sjálfur áður gagnrýnt Trump og sagt að „einhver sem setur fram slíkar yfirlýsingar hefur ekki dómgreind, skapgerð eða skilninginn til að sinna valdamesta embætti í heimi.“