Leikmenn Bayern München fá allir nýjan Audi

Nú í upphafi leiktímabils er sá tími sem allir leikmenn stórliðsins Bayern München fá að velja sér nýja gerð Audi bíls sem þeir aka næstu 12 mánuði. Það verður að teljast til eins af ágætum kostum þess að spila fyrir Bayern München. Langflestir leikmenn Bayern, eða 15 talsins, völdu sér Audi RS6 og RS7 bíla sem eru 610 hestafla spyrnukerrur.

Þjálfari liðsins, Carlo Angelotti valdi sér hinsvegar flaggskipið Audi A8 og nokkriri leikmenn völdu sér Audi Q7 eða A7 Sportback bíla. Sérstök athöfn var haldin þegar þessir bílar voru afhentir leikmönnunum á Audi Piazza torginu og afhenti stjórnarformaðurinn Rupert Stadler leikmönnum lykla sína.

Samstarf Audi og Bayern München hófst árið 2002 og er þetta tímabil því það fimmtánda í röðinni þar sem leikmenn aka eingöngu á Audi bílum. Fyrsti leikur Bayern München á þessu keppnistímabili í Bundeslígunni verður gegn Werder Bremen á föstudaginn og það verður ekki slorlegur floti Audi bíla sem verður fyrir utan leikvanginn að þessu sinni.