Segir innköllun Drekaleyfa þýða milljarðaskaðabætur

Innköllun sérleyfa á Drekasvæðinu yrði brot á milliríkjasamningum og myndi kalla á milljarðaskaðabætur, að mati stjórnarformanns Eykons, Heiðars Guðjónssonar. Hann segir ekki hægt að breyta leikreglum eftirá. 

Þrír iðnaðarráðherrar Samfylkingarinnar voru í lykilstöðum þegar olíuleitin var boðin út, fyrst Össur Skarphéðinsson en síðan þær Katrín Júlíusdóttir og Oddný Harðardóttir. Þáverandi formaður Vinstri grænna, Steingrímur J. Sigfússon, var svo orðinn ráðherra málaflokksins þegar fyrstu sérleyfunum var úthlutað.

Aðild kínverska ríkisolíufélagsins CNOOC gæti þó ráðið úrslitum um framvindu olíuleitarinnar en tilkynnt var um hana sex vikum eftir Kínaheimsókn Jóhönnu Sigurðardóttur en þar var fríverslunarsamningur ríkjanna undirritaður.

En straumar í stjórnmálum hafa breyst. Flokkar sem áður stóðu fyrir því að úthluta leyfunum vilja núna að hætt verði við allt saman.

Stjórnarformaður Eykons, Heiðar Guðjónsson, kveðst hissa, - segir leitar- og vinnsluleyfin byggja á mjög faglegum vinnubrögðum. Þau byggi á norskri fyrirmynd og á alþjóðlegum samningum.

„Þannig að ef einhver ætlar að gerast svo djarfur að innkalla leyfin þá er hann að brjóta milliríkjasamninga; við Kína, við Noreg, - og samninginn sem var lagður til grundvallar olíuskiptum þarna árið 1981, - við Noreg. Svo er hann væntanlega að brjóta líka samninga við Kanada og Bretland útaf Ithaca-leyfinu. Þannig að þá eru íslensk stjórnvöld orðin margbrotleg við alþjóðasamninga. Ég efast um að nokkur vilji gerast sekur um slíkt,“ segir Heiðar og telur að slíkt hefði víðtæk áhrif. 

„Það myndi náttúrlega gera það að verkum að menn myndu ekki þora að fjárfesta hérna vegna þess að eignarrétturinn væri ekki mikils virði og það væri hægt að breyta leikreglum eftirá. En ég bara hreinlega trúi því ekki að einhver vilji leggja út í slíka ógæfuför.“

Þá eru sérleyfishafarnir þegar búnir að kosta miklu til, meðal annars með rannsóknarleiðöngrum. 

„Við erum búnir að eyða milljörðum í þetta. Það væru nú svona lágmarks skaðabætur sem maður myndi fara fram á. En á þeim tíma sem við höfum verið að vinna leyfið þá hefur þetta svæði margfaldast að verðgildi.

Þannig að ég skil ekki þá aðila sem eru að halda svona fram. Þeir þurfa auðvitað að skoða það í hverju þetta endar, ef þeir ætla sér að fara í svona æfingar.“ 

Hér má sjá viðtal Stöðvar 2 við Heiðar Guðjónsson.