Arnar Davíð í 8. sæti í Olomouc

Arnar Davíð Jónsson, úr Keilufélagi Reykjavíkur, hefur lokið keppni á ECC, Evrópumóti landsmeistara, í Olomouc í Tékklandi.

Arnar endaði í 8. sæti og átti gott mót. Arnar spilaði í heildina á 225.11 í meðaltal.

„Í heildina er ég sáttur við frammistöðuna. Ég kom inn í átta manna úrslitin í erfiðri stöðu sem sést best á því að þó ég spili vel í dag hefur það ekkert að segja. Auðvitað er alltaf hægt að finna hluti sem hefðu mátt klára betur en 8. sætið er staðreynd og er ég nokkuð sáttur við það,“ sagði Arnar eftir keppnina í dag.

Í undanúrslitum í karlaflokki leika Jaroslav Lorenc frá Tékklandi, James Gruffman frá Svíþjóð, Antonio Fiorentino frá Ítalíu og Hadley Morgan frá Englandi.

Í kvennaflokki eru það Casja Wagner frá Svíþjó, Maria Bulanova frá Rússlandi, Nicole Sanders frá Hollandi og Nadine Geissler frá Þýskalandi sem leika til undanúrslita.