Arnar Már hlýtur verðlaun Norðurlandaráðs

Arnar Már Arngrímsson hefur hlotið barna- og unglingabókmenntaverðlaun Norðurlandaráðs fyrir skáldsögu sína Sölvasögu unglings. Er þetta í fjórða sinn sem verðlaun eru veitt í þessum flokki en þau koma nú í fyrsta skipti í hlut Íslendings.

Verðlaunaathöfnin stendur nú yfir en veitt eru verðlaun í fimm flokkum: bókmenntum, tónlist, kvikmyndum, barna- og unglingabókum og umhverfisvernd.

Athöfnin fer að þessu sinni fram í tónleikahúsi Danska ríkisútvarpsins í Kaupmannahöfn.

Þrettán verk voru tilnefnd til barna- og unglingabókmenntaverðlauna Norðurlandaráðs í ár. Tveir íslenskir höfundar hlutu tilnefningu, þau Arnar Már Arngrímsson fyrir Sölvasögu unglings og Ragnhildur Hólmgeirsdóttir fyrir Koparborgina.

Verðlaunafé er 350 þúsund danskar krónur sem nemur 5,8 milljónum íslenskra króna. Handhafi verðlaunanna frá því í fyrra, Svíinn Jakob Wegelius, afhenti Arnari Má verðlaunin og verðlaunaféð á athöfninni í Kaupmannahöfn nú fyrr í kvöld.

Í rökstuðningi dómnefndar segir:

„Verðlaunabókin fjallar um nútímaungling og viðfangsefnin sem hann þarf að glíma við. En þó vandamálin séu kunnugleg er unglingurinn það ekki. Höfundi tekst í þessari fyrstu bók sinni að búa til persónu sem er áhugaverð, fyndin, óþolandi, leitandi og heillandi. Tungutak sögunnar er lífleg blanda af unglingamáli og ritmáli eldri kynslóðarinnar og þar rekast á menningarheimar.

Lesendur fylgja unglingnum gegnum tilvistarkreppur hans sem sýna hve stormasöm unglingsárin eru og erfitt að stýra gegnum þau án skipbrots. Því nær höfundurinn, Arnar Már Arngrímsson, að miðla af einlægni og trúnaði sínum við ungt fólk í Sölvasögu unglings.”