Fjögur núll sigrar hjá Spánverjum og Ítölum | Ísraelar unnu fáliðaða Albani

Spánverjar áttu ekki í miklum vandræðum með að leggja Makedóníu að velli í undankeppni HM 2018 í kvöld. Lokatölur 4-0, spænska liðinu í vil.

Spánn er búið að vinna þrjá af fyrstu fjórum leikjum sínum í G-riðli og gera eitt jafntefli. Markatalan er 15-1.

Vitolo, Nacho Monreal og Artiz Aduriz skoruðu mörk Spánverja í leiknum í kvöld auk þess sem Darko Velkovski, leikmaður Makedóníu, skoraði sjálfsmark.

Spánverjar eru með tíu stig á toppi G-riðils líkt og Ítalir sem unnu einnig 4-0 sigur á Liechtenstein á útivelli.

Öll fjögur mörk ítalska liðsins komu í fyrri hálfleik. Andrea Belotti, leikmaður Torino, skoraði tvö þeirra og þeir Ciro Immobile og Antonio Candreva sitt markið hvor.

Ísrael hefur einnig farið vel af stað í G-riðli en ísraelska liðið vann 0-3 sigur á því albanska í kvöld.

Ísraelar fengu tvær vítaspyrnur í leiknum og í bæði skiptin var leikmaður Albaníu rekinn af velli.

Eran Zahavi kom Ísrael yfir með marki úr vítaspyrnu á 18. mínútu eftir að Berat Djimsiti gerðist brotlegur innan vítateigs.

Zahavi fór aftur á punktinn á 58. mínútu en Alban Hoxha varði frá honum. Hoxha var nýkominn inn á eftir að Etrit Berisha lét reka sig út af.

Níu leikmenn Albana áttu ekki mikla möguleika og Dan Einbinder og Eliran Atar bættu við mörkum áður en yfir lauk.

Ísrael er með níu stig í 3. sæti riðilsins, þremur stigum á undan Albaníu sem er í því fjórða.