Skelfilegur lokaleikur og Ísland úr leik

Ísland kemst væntanlega ekki í umspil um sæti á HM 2017 í handbolta eftir sjö marka tap, 20-27, fyrir Makedóníu í lokaleik liðsins í undanriðli 3 í dag.

Ísland mátti tapa leiknum með sex marka mun en í dag fór allt úrskeiðis. Íslenska liðið þarf núna að treysta á að Færeyjar nái stigi af Austurríki til að eiga möguleika á að komast áfram. Líkurnar á því eru þó sáralitlar.

Íslenska liðið vann fyrstu tvo leiki sína í riðlinum en spilaði engan veginn nógu vel í leiknum í dag.

Íslenska vörnin var míglek í byrjun og eftir átta mínútur var staðan 2-7, Makedóníu í vil. Ísland vann sig þó inn í leikinn og í hálfleik var staðan 11-15, Makedóníu í vil.

Makedónar skoruðu fyrstu þrjú mörkin í seinni hálfleik og eftir það var róðurinn þungur.

Þegar tvær mínútur voru til leiksloka komst Makedónía í 18-26. Axel Stefánsson tók þá leikhlé og íslenska liðið svaraði með tveimur mörkum í röð. Makedónía átti hins vegar síðustu sóknina og Elena Gjeorgjievska skoraði 27. mark makedónska liðsins alveg undir lokin.

Þórey Rósa Stefánsdóttir og Karen Knútsdóttir skoruðu fimm mörk hvor fyrir Ísland í dag.

Uppfært 19:30

Austurríki vann Færeyjar og Ísland kemst því ekki áfram.

Mörk Íslands:

Karen Knútsdóttir 5/3, Þórey Rósa Stefánsdóttir 5, Rut Jónsdóttir 2, Sunna Jónsdóttir 2, Birna Berg Haraldsdóttir 2, Arna Sif Pálsdóttir 1, Steinunn Hansdóttir 1, Hildigunnur Einarsdóttir 1, Hrafnhildur Hanna Þrastardóttir 1.