Kveður eftir 15 ára feril

Róbert Gunnarsson, línumaður íslenska landsliðsins og lykilmaður þess undanfarinn áratug, er hættur að leika með landsliðinu. Hann gaf ekki kost á sér í HM-hópinn en Geir Sveinsson landsliðsþjálfari tilkynnti í gær stóra 28 manna hópinn sem kemur saman til æfinga á milli jóla og nýárs.

„Ég er búinn að liggja lengi yfir þessu. Maður ákveður ekki svona upp úr þurru. Þetta er búið að gerjast í mér í langan tíma,“ segir Róbert en hann segir erfitt að kveðja.

„Við erum búnir að ganga í gegnum súrt og sætt saman strákarnir. Endalaust af stórmótum og ferðalögum sem og hlátri og gráti. Þetta er búin að vera rússíbanareið en öll ævintýri hafa sinn enda. Þetta er minn endir og ég geng stoltur frá borði. Er stoltur af því sem ég hef gert með strákunum sem eru orðnir mínir bestu vinir í dag.“

Landsliðsþjálfarinn Geir Sveinsson skilur afstöðu Róberts.

„Hann er að taka það skref eins og fleiri hafa verið að gera upp á síðkastið.,“ segir Geir um ákvörðun Róberts. „Þetta er bara svona núna. Róbert er að draga sig til baka og það er allt í góðu. Ég virði ákvörðun hans enda hefur hann átt glæstan feril með landsliðinu.“

Róbert spilaði sinn fyrsta landsleik árið 2001 og á að baki 276 leiki en í þeim hefur hann skorað 773 mörk. Hann var bæði í silfurliðinu í Peking 2008 og bronsliðinu á EM í Austurríki árið 2010 og var máttarstólpi í stærstu afrekum íslenska landsliðsins. Fimmtán ára löngum landsliðsferli hans er nú lokið.

Arnór enn þá tæpur

Arnór Atlason er í 28 manna hópnum þrátt fyrir að vera mjög tæpur vegna meiðsla. Fresturinn til að skila þessum stóra hópi rann út í gær og sá Geir sig knúinn til að taka áhættuna enda hefur Arnór verið einn af stóru póstunum í liðinu til margra ára og er enn viljugur til að spila fyrir Ísland.

„Við verðum að leyfa Arnóri að njóta vafans. Hann er alls ekki 100 prósent en Álaborg á leik á miðvikudaginn og þá sjáum við hvort hann verður með,“ segir Geir.

Theodór Sigurbjörnsson, hægri hornamaður ÍBV, varð fyrir því óláni að meiðast á dögunum en hann hefði annars verið í hópnum. Í hans stað fær Óðinn Þór Ríkharðsson úr FH sæti í 28 manna hópnum.

„Við settum Tedda í skoðun í gær þar sem kom endanlega fram að hann verður frá í einn til tvo mánuði. Það staðfesti að við gátum ekki tekið hann með. Þetta er klárlega mjög svekkjandi fyrir hann .“

Tveir nýliðar og Vignir

Óðinn Þór er annar tveggja nýliða í hópnum en einnig fær Elvar Örn Jónsson úr Selfossi tækifæri til að sanna sig. Þeir eru tveir af fimm leikmönnum úr U20 ára landsliðinu.

„Óðinn hefur klárlega unnið fyrir sínu sæti þó Teddi væri á undan honum en hann hefur sýnt góða hluti eins og Elvar og fleiri. Þetta er framtíðin og ég vil gefa þessum strákum tækifæri til að komast inn í þetta hjá okkur,“ segir Geir.