Raf­magns­bíla­fram­leið­endur kaupa gamlar bíla­verk­smiðjur

Tesla hóf bílaframleiðslu sína í aflagðri bílaverksmiðju sem var bæði í eigu General Motors og Toyota í Kaliforníu. Nú hefur annar rafmagnsbílaframleiðandi, Rivian Automotive, gert það sama, þ.e. keypt aflagða versksmiðju sem var í eigu Mitsubishi og Chrysler og er hún í Illinois ríki, 130 mílum frá Chicago.

Þessi verksmiðja er um 215.000 fermetrar. Þar ætlar Rivian Automotive að hefja smíði rafmagnsbíla sinna árið 2019 og ætlar að fjárfesta fyrir hátt í 5 milljarða króna til að gera verksmiðjuna tilbúna til framleiðslu. Rivian Automotive nýtur skattalegra afslátta frá Illinois ríki næstu 5 ár en Rivian Automotive ætlar að ráða 1.000 starfsmenn til ársins 2024.

Verksmiðjan sem Rivian Automotive keypti af Mitsubishi og Chrysler var reist árið 1988 og í henni hafa verið framleiddir um 250.000 bílar á ári. Mitsubishi hætti framleiðslu í verksmiðjunni í fyrra. Rivian Automotive hefur frá stofnun skipt tvisvar um nafn, hét fyrst Mainstream Motors, síðan Avera Automotive, en Rivian Automotive frá árinu 2011.

Rivian flutti höfuðstöðvar sínar frá Florida til Detroit í fyrra. Verksmiðja Tesla í Kaliforníu er í Fremont, um 60 kílómetra suðaustur af San Francisco og verksmiðjan þar verður líklega stækkuð um helming á næstunni til að geta framleitt mikið magn Tesla Model 3 bílsins. Við það mun starfsmannafjöldinn fara úr 6.200 í 9.300.