Sér ekki eftir að hafa svindlað allan ferilinn

Danski hjólreiðamaðurinn Michael Rasmussen, sem var hársbreidd frá sigri í Tour de France árið 2007 áður en honum var kippt úr keppni af eigin liði, hélt afar áhugaverðan fyrirlestur í háskólanum í Reykjavík í gær þar sem hann sagðist ekki í eina sekúndu sjá eftir því að hafa notað árangursbætandi efni á glæstum ferli sínum.

Rasmussen var einn þriggja fyrirlesara á ráðstefnu um lyfjamál sem ÍSÍ og ÍBR héldu sem hluta af Reykjavíkurleikunum í gær. Auglýst var að hann ætlaði að tala um lyfjamisnotkun á ferlinum, sem og hann gerði, en þeir sem héldu að hann væri fullur iðrunnar kom ræða hans mikið á óvart. Fyrirlesturinn snerist meira um hversu brotið lyfjaeftirlitskerfið er og muninn á því hvernig komið er fram við íþróttamenn eftir því hversu frægir og góðir þeir eru.

„Það er mikilvægt að fólk séupplýstara um hvað er í alvörunni að gerast í þessum heimi. Þetta er ekki bara svart og hvítt. Það er mikilvægt að skilja hvernig þetta virkar fyrir íþróttamennina og hvernig þeir komast á þann stað að nota árangursbætandi lyf.  Þessir íþróttamenn eru mannlegir en bara af öðru kyni en sófakartöflurnar heima. Viljinn til að vinna er bara meiri,“ sagði Rasmussen við íþróttadeild eftir fyrirlesturinn í gær.

Daninn, sem viðurkenndi árið 2013 að hafa notað árngursbætandi efni allan sinn feril, gekk fram af sumum í salnum eins og Líney Rut Halldórsdóttur, framkvæmdastjóra ÍSÍ, sem ofbauð afstaða Danans og spurði hann úr sal hvort eftirsjáin væri hreinlega engin. Eina sem hann sér eftir er að fá fleiri með sér í lyfin.

„Við erum afurð ákveðins menningarheims. Það tekur langan tíma að breyta svona langri sögu. Það er auðvelt að breyta skoðun eins manns á einni nóttu og það er alltaf auðveldara að breyta skoðun annarra en þinni eigin. Þessir tveir heimar eru mjög langt frá hvorum öðrum,“ segir hann.

Rasmussen er stórstjarna í hjólreiðum. Hann var með góða forystu í Tour de France þegar fjórir áfangar voru eftir árið 2007 og átti sigurinn vísan. Þá var honum kippt úr keppni þegar upp komst að hann laug að lyfjaeftirlitinu um staðsetningu sína tveimur árum áður. Hann er reyndar ekki sammála þeirri fullyrðingu en ekkert varð af sigrinum. Það eina sem hann sér eftir þar er að hans eigin lið eyðilagði fyrir honum sigurinn.

„Vandamálið er að þeir náðu mér aldrei. Það hefði verið mun auðveldara fyrir mig að sætta mig við að vera rekinn úr Tour de France ef ég hefði fallið á lyfjaprófi því þá hefði ég bara verið heimskur. Málið er að ég hef aldrei á ævinni fallið á lyfjaprófi. Það sem særði mig var það, að mitt eigið lið tók mig úr keppninni. Það var sama liðið sem stóð fyrir þessu öllu og lét mig fá blóðpokana, faldi EPO í rútunni og gaf mér insúlín. Það var þetta lið sem tók mig úr keppni því enginn annar gat gert það samkvæmt reglubókinni,“ segir Michael Rassmussen.

Alla fréttina úr kvöldfréttum Stöðvar 2 má sjá hér að ofan en nánar verður rætt við Michael Rasmussen í Fréttablaðinu á morgun.