PSA að klára kaupin á Opel frá GM

Allt stefnir í að PSA Peugeot-Citroën kaupi Opel af General Motors og með því verði til annar stærsti bílaframleiðandi Evrópu á eftir Volkswagen. Búist er við því að kaupin verði undirrituð snemma í næstu viku. Helgin framundan verður notuð til að hnýta alla lausa enda með það að markmiðið að tilkynna um kaupin á mánudaginn.

Þó gæti mikið flækjustig tafið endanleg kaup, er haft eftir viðsemjendum. Snýr það einna helst að lífeyrisgreiðslum starfsmanna Opel og Vauxhall og vantar víst um 950 milljarða króna í eftirlaunasjóð GM til að standa undir greiðslum til þeirra í framtíðinni.

PSA Peugeot-Citroën sér fyrir sér talsverð jákvæð samlegðaráhrif af sameiningu Opel/Vauxhall við framleiðslu samhliða Peugeot og Citroën bíla og sameiginleg íhlutakaup ættu strax að geta sparað 2 milljarða Evra á ári. Þá felst einnig mikill sparnaður í því að fækka í yfirstjórn fyrirtækjanna allra við sameininguna.

Forstjóri PSA, Carlos Tavarer ætlar að meðhöndla Opel/Vauxhall með sama hætti og hann gerði svo vel með Peugeot og Citroën, en honum tókst að snúa taprekstri þeirra uppí góðan hagnað. Tavares ætlar einnig að víkka út markaðssvæði Opel, en GM hefur hingað til haldið merkinu frá ýmsum mörkuðum til að vernda önnur bílamerki GM þar.

Með sameiningu PSA og Opel/Vauxhall verður til framleiðandi á 5 milljónum bíla á ári og verður því um það bil hálfdrættingur á við Volkswagen, stærsta bílaframleiðanda heims.