Stakk mann og lét hann millifæra rúma milljón inn á sig

Hæstiréttur hefur staðfest fjögurra vikna gæsluvarðhald yfir karlmanni sem grunaður er um að hafa með ofbeldi rænt annan mann og stungið hann í höndina með hníf inni í Skautahöllinni í Laugardal síðastliðinn föstudag. Þá er hann grunaður um að hafa reynt að brjótast inn í bíl við Þróttarsvæðið.  

Maðurinn sem sætir varðhaldi er sagður hafa neytt hinn manninn til að millifæra rúmlega eina milljón króna inn á reikning sinn, með því að ógna honum með hníf.  Maðurinn er sakaður um að hafa borið hníf að hálsi hins mannsins og svo stungið hann í handarbak vinstri handar þegar hann neitaði að fara inn á heimabanka sinn.

Brotaþoli sagði jafnframt í skýrslutöku lögreglu að maðurinn hefði haft uppi hótanir um að stinga sig og skera og hótað að nauðga honum ef hann segði frá atvikinu. Hann hafi þurft að millifæra samtals 1.050.000 krónur í tveimur færslum. Einnig hafi maðurinn stolið bakpoka hans og farsíma. Brotaþoli gat lýst manninum vel, meðal annars húðflúri á annarri hendinni hans.

Maðurinn var handtekinn um klukkan 22.30 í gærkvöldi en við leit í bíl hans fannst sími brotaþolans, bakpoki og fartölva.

Rannsókn málsins er vel á veg komin. Dómurinn taldi brot mannsins sérstaklega alvarlegt og því sé nauðsyn á gæsluvarðhaldi á grundvelli almannahagsmuna.