Heimir: Verður jafnt mót og erfitt

FH verður Íslandsmeistari þriðja árið í röð ef marka má spá forráðamanna, fyrirliða og þjálfara sem birt var á árlegum kynningarfundi Pepsi-deildarinnar í dag.

Heimir Guðjónsson segir að spáin hafi ekki komið á óvart og að það sé gott að það séu kröfur gerð á lið hans, FH.

„Ég held að menn átti sig á því að það er pressa í Hafnarfirði. Það er jákvætt, menn vilja gera vel og standa sig vel. Stuðningsmennirnir og fólkið í kringum liðið gerir kröfur og það er gott,“ sagði Heimir eftir að spáin var kunngjörð í hádeginu í dag.

FH varð Íslandsmeistari í fyrra með talsverðum yfirburðum en Heimir reiknar með að tímabilið í ár verði erfiðara.

„Miðað við undirbúningstímabilið þá þarf FH að gera töluvert betur. Það eru fleiri lið um hituna í ár. KR, Valur, Stjarnan og Breiðablik hafa litið mjög vel út á undirbúningstímabilinu og KA og Víkingar sömuleiðis,“ segir Heimir.

„Ég held að þetta verði jafnt mót og erfitt.“