Kaupþing fái ekki meira en 100 milljónir punda fyrir verslanir sínar

Gert er ráð fyrir að Kaupþing fái undir hundrað milljónir punda fyrir fataverslanir sínar Coast, Warehouse og Oasis. Þá er talið að væntanlegir eigendur muni loka nokkrum verslunum sínum í Bretlandi til þess að bregðast við erfiðu rekstrarumhverfi þar í landi.

Þetta kemur fram á vef Telegraph en þar segir að tvö fyrirtæki hið minnsta hafi sýnt verslunarkeðjunni áhuga, og að þau hafi í hyggju að reyna að snúa erfiðum rekstri við með því að loka nokkrum verslunum.

Bresku verslanakeðjurnar þrjár hafa verið í eigu Kaupþings frá árinu 2009, sem heldur utan um erlendar eignir gamla Kaupþings. Áður voru þær í eigu Mosaic Fashions en Baugur var stærsti hluthafinn í því félagi. Fyrrnefnt félag varð gjaldþrota í framhaldi af gjaldþroti Baugs árið 2009. Kaupþing setti verslanirnar á sölu í nóvember í fyrra.

Fimm þúsund manns starfa í verslununum, en um er að ræða eina stærstu tískuvörukeðju Bretlands. Heimildir Telegraph herma að nýir eigendur muni loka öllum verslunum á Oxford stræti í Lundúnum meðal annars vegna sífellt hækkandi leigu sem hafi gert rekstraraðilum erfitt fyrir, þrátt fyrir að um sé að ræða eina stærstu tískuvörukeðju Bretlands.

Sömuleiðis hefur verið mikill samdráttur í breskri fataverslun síðustu misseri og hafa fatakeðjurnar þrjár verið metnar á undir hundrað milljónir punda, sem samsvarar tæplega 14 milljörðum íslenskra króna.