Óttast að íþróttahúsinu verði breytt í tjaldvagnageymslu

Helgi Kjartansson, oddviti Bláskógabyggðar, óttist að ríkisvaldið ætli að breyta íþróttahúsinu á Laugarvatni í tjaldvagnageymslu því ríkið hefur ákveðið að loka íþróttahúsinu og sundlauginni á staðnum frá 1. júní. Nemendur Menntaskólans að Laugarvatni og íbúar eru mjög ósáttir við ákvörðunina.

Háskóli Íslands hefur tekið ákvörðun um að hætta rekstri þróttafræðaseturs á staðnum, og þar af leiðandi verður húsinu og sundlauginni lokað. Hvoru tveggja er alfarið í eigu íslenska ríkisins. Heimamenn segjast ósáttir því þeir fái ekki samtal við stjórnvöld um hvað gerist á Laugarvatni eftir 1. júní.

Skólinn í hættu

„Þetta er að veltast á milli ráðuneyta eða háskólinn er held ég enn þá með þetta hjá sér, ætlar að skila þessu til menntamálaráðuneytisins og þaðan sennilega til ríkiseigna og þetta er einhver dilemma og við bara fáum engin svör,“ segir Helgi.

„Það mun allavega ekki standa á Bláskógabyggð að leysa þetta mál. Við erum með ýmsar hugmyndir en við fáum ekki samtal við eiganda hússins.“

Helgi segir að lokunin muni hafa mikil áhrif á Menntaskólann að Laugarvatni.

„Ef að húsið bara lokar og ríkið ætlar að nota þetta sem tjaldvagnageymslu eða eitthvað, þá er menntaskólinn náttúrulega í hættu. Hann þarf húsið. Hann getur ekki án hússins verið. Og það er eins með samfélagið hérna – fólk mun náttúrulega bara flytja í burtu, það mun allavega ekki flytja að. Það segir sig sjálft. Þannig að þetta er bara alvarleg staða.“

Nokkurs konar BSÍ Laugvetninga

Þá eru nemendur menntaskólans langt frá því að vera sáttir, að sögn Þórarins Guðna Helgasonar, nemanda við ML.

„Við megum ekki gleyma því að þetta er ekki bara íþróttaaðstoða ML-inga sem við höfum ekki hugmynd um hvernig verður ráðstafa, þetta er líka eins konar BSÍ Laugarvatns. Hér sameinast Laugvetningar í frístundum og tómstundum með sín börn.“