Hvetja Trump til að halda sig við Parísarsamkomulagið

Afstaða Donalds Trump og ríkisstjórnar hans til lofstlagsmála veldur þjóðarleiðtogum sem unnu að samþykkt Parísarsamkomulagsins hugarangri. Hvetja þeir forsetann til að halda sig við samkomulagið.

Frá því að Trump tók við embætti og skipaði Scott Pruitt, sem hefur lýst því yfir að hann telji koltvísýring ekki meginorsök hnattrænnar hlýnunar, sem forstjóra Umhverfisstofnunar Bandaríkjanna, hafa leiðtogar annarra ríkja beðið á milli vonar og ótta um hvort Bandaríkin segi sig frá Parísarsamkomulaginu. Því er ætlað að draga úr losun þjóða á gróðurhúsalofttegundum.

Tvær ólíkir fylkingar innan ríkisstjórnar Trump eru sagðar takast á. Annars vegar eru harðkjarnaloftslagsafneitarar eins og Stephen Bannon sem er sagður tala fyrir því að Trump rifti Parísarsamkomlaginu eins og hann boðaði í kosningabaráttu sinni. Hins vegar eru aðrir sem tala fyrir því að Bandaríkin haldi sig við samkomulagið og tali fyrir breyttum áherslum innan þess. Þeirra á meðal eru Rex Tillerson, utanríkisráðherra, Ivanka Trump og eiginmaður hennar Jared Kushner.

Hefur verstu afleiðingarnar fyrir heimsbyggðina

Talið er að Trump muni taka ákvörðun um framtíð samkomulagsins í þessum mánuði, jafnvel í þessari viku. Washington Post greindi frá því í vikunni að svo virtist sem að andstæðingar Parísarsamningsins innan ríkisstjórnarinnar hefðu orðið ofan á. 

Embættismenn frá nokkrum löndum sem The Guardian hefur rætt við lýsa áhyggjum sínum af vegferð bandarískra stjórnvalda.

„Ég hef miklar áhyggjur af því sem er að gerast í Bandaríkjunum hvað varðar loftslagsbreytingar. Það var sérstaklega mikið áfall að heyra að Trump hafi skrifað undir tilskipun um að breyta áætluninni um hreina orku [sem Barack Obama setti]. Af öllum stefnumálum Trump þá hefur þetta verstu afleiðingarnar fyrir heimsbyggðina,“ segir Ramón Méndez, fyrrverandi yfirmaður loftslagsstefnu Úrúgvæ sem tók þátt í að leggja drög að Parísarsamkomulaginu.

Vísar Méndez þar til tilskipunar Trump um að Umhverfisstofnunin endurskoði áætlun Obama um hreina orku sem var ætlað að draga úr losun gróðurhúsalofttegunda frá orkuverum. Trump hefur einnig sett framkvæmdir við tvær umdeildar olíuleiðslur, Keystone XL og Dakota Access, aftur af stað.

Bandaríkjamenn eru aðrir stærstu losendur gróðurhúsalofttegunda í heiminum en Kínverjar fóru nýlega fram úr þeim. Losa Bandaríkin um fimmtung þess magns gróðurhúsalofttegunda sem menn bera ábyrgð á.

Ætli Bandaríkjamenn sér að hætta við að draga úr losun sinni er það sérstakt áhyggjuefni fyrir íbúa á Kyrrahafseyjum sem hækkandi yfirborð sjávar ógnar.

„Framtíð landsins míns veltur á að hvert og eitt ríki standi við loforðin sem þau gáfu í París. Okkar eigin skuldbinding mun ekki bregðast,“ segir Hilda Heine, forseti Marshall-eyja, sem lýsir gríðarlegum vonbrigðum sínum með að Bandaríkjamenn séu að draga í land í loftslagsmálum.

Erik Solheim, umhverfisstjóri Sameinuðu þjóðanna, varar við því að dragi Bandaríkjamenn sig frá Parísarsamkomulaginu muni það koma niður á þeim sjálfum. Störf í grænni orku munu flytjast til Kína.

„Framtíðin er græn,“ segir Solheim.

Ákveði Trump að segja Bandaríkin frá Parísarsamkomulaginu er talið að úrsagnarferlið taki um þrjú ár.