Hjörvar: Að reka Arnar eftir tvo leiki hefur ekkert með fótbolta að gera

Málefni Arnars Grétarssonar voru eðlilega rædd í Pepsimörkunum í gær en Arnar var rekinn frá Blikunum eftir aðeins tvo leiki.

„Ef það var samningur á borðinu fyrir 2-3 mánuðum þá er auðvitað undarlegt að hann hafi verið látinn fara á þessum tímapunkti. Ég hins vegar heyri það að þessi samningur hafi verið á borðinu mjög skömmu eftir síðasta tímabil. Honum var svo skóflað af borðinu mjög fljótt því Arnar var ósáttur við þá skilmála sem voru í honum,“ segir Óskar Hrafn Þorvaldsson og bætir við að það hafi verið efasemdir uppi þá hvort ætti að slíta samstarfinu við Arnar. Ákveðið hefði verið á endanum að standa við bakið á þjálfaranum.

„Þetta samningstilboð var einhvers konar stuðningsyfirlýsing en það eru ekki 2-3 mánuðir síðan hann fékk tilboðið. Ég held það sé ágætt að hafa það rétt.“

Hjörvar Hafliðason bendir á að nýr formaður hafi tekið við taumunum hjá knattspyrnudeild Breiðabliks í febrúar.

„Þetta er ekki hver sem er sem Blikarnir eru að reka. Þetta er Arnar Grétarsson. Einn leikjahæsti leikmaður félagsins frá upphafi og öll hans fjölskylda er mikil Breiðabliksfjölskylda,“ segir Hjörvar og bætir við að Breiðablik hafi líklega verið á eðlilegum stað í deildinni miðað við hversu mikið sé lagt í liðið.

„FH, Valur, KR og Stjarnan eyða öll meiri pening í liðin sín. Eru Blikarnir þar af leiðandi ekki á þeim stað sem þeir eiga að vera á? Þetta helst í hendur. Árið 2015 þá er Arnar Grétarsson sá eini sem getur keppt við FH. Blikar fengu þá fleiri stig en þegar þeir urðu Íslandsmeistarar 2010,“ segir Hjörvar.

„Að reka hann eftir tvo leiki hefur ekkert með fótbolta að gera. Þá er einhver allt önnur ástæða. Það hefur bara eitthvað gengið á í samskiptum þarna. Þú rekur engan eftir tvo leiki.“