Rúmur þriðjungur hersins veldur usla og heimtar peninga

Rúmlega þriðjungur hermanna Fílabeinsstrandarinnar standa nú í uppreisn og hafa valdið usla í fjórum borgum í landinu þar sem þeir fara um götur og skjóta í loftið. Þeir segja ríkið skulda sér um 9.500 dali (tæp milljón króna) á mann og segjast ekki tilbúnir til viðræðna. Herinn sagðist í gær ætla að ráðast gegn uppreisnarmönnunum en hefur nú hætt við.

Um er að ræða fyrrverandi uppreisnarmenn sem komu forseta Fílabeinsstrandarinnar til valda árið 2011 og fengu störf hjá hernum í kjölfarið. Alls eru þeir um 8.400 talsins, en í heildina eru hermenn landsins um 22 þúsund. Hermennirnir sem um ræðir voru áður uppreisnarmenn og hafa staðið í langvarandi deilum við ríkið.

Deilurnar hófust í byrjun ársins þegar uppreisnarmennirnir fyrrverandi og núverandi, lýstu því yfir að þeir töldu ríkið skulda sér laun og bónusa fyrir uppreisnardaga sína. Á endanum lét ríkið undan kröfum þeirra og lofaði 15.500 dölum (um 1,6 milljón) á hvern mann. Síðan þá höfðu mennirnir fengið 6.500 dali borgaða, samkvæmt frétt BBC.

Í síðustu viku lýsti talsmaður uppreisnarmannanna því yfir að þeir myndu láta af kröfum sínum. Það reitti mennina sem um ræðir til reiði, en svo virðist sem þeir hafi ekki vitað af yfirlýsingu talsmannsins.

Nú hafa uppreisnarmennirnir lýst því yfir að kröfur þeirra séu ekki vegna vangoldinna launa og lýsa þeim sem starfslokagreiðslum.

Efnahagur Fílabeinsstrandarinnar hefur orðið fyrir skakkaföllum að undanförnu og segist ríkið ekki hafa efni á greiðslum til uppreisnarmannanna og hefur gefið þeim þann úrslitakost að leggja niður vopn.

Óttast er að til átaka komi á milli fylkinga en átök eru mönnum enn í fersku minni eftir tíu ára borgarastyrjöldina sem lauk árið 2011.