Þórsarar fengu fyrstu stigin

Þór náði í sín fyrstu stig í Inkasso-deildinni þegar liðið bar sigurorð af Haukum, 2-1, á Þórsvelli í dag.

Þórsarar lentu undir strax á 5. mínútu en lögðu ekki árar í bát, komu til baka og náðu í stigin þrjú.

Elton Renato Livramento Barros kom Haukum yfir fimm mínútna leik með skoti af stuttu færi eftir hornspyrnu.

Á 33. mínútu fengu heimamenn vítaspyrnu. Ármann Pétur Ævarsson fór á punktinn og jafnaði metin.

Á upphafsmínútu seinni hálfleiks skoraði Gunnar Örvar Stefánsson svo sigurmark Þórs eftir sendingu frá Jónasi Björgvini Sigurbergssyni. Lokatölur 2-1, Þór í vil.

Með sigrinum komust Þórsarar upp í 10. sæti deildarinnar. Haukar eru í 8. sætinu með fimm stig, tveimur stigum meira en Þór.

Upplýsingar um úrslit og markaskorara eru fengnar frá Fótbolta.net.