Niður um þrjár deildir á þremur árum

Það er óhætt að segja að það hafi sigið á ógæfuhliðina hjá þýska fótboltaliðinu Paderborn á undanförnum árum.

Í september 2014 sat Paderborn á toppi þýsku úrvalsdeildarinnar en í dag féll liðið niður í D-deildina.

Paderborn hefur því fallið niður um þrjár deildir á jafn mörgum árum.

Paderborn endaði í átjánda og neðsta sæti þýsku úrvalsdeildarinnar tímabilið 2014-15. Á næsta tímabili endaði liðið í neðsta sæti B-deildarinnar og féll niður í C-deildina.

Paderborn var í miklu basli í nær allan vetur og þrátt fyrir ágætis endasprett endaði liðið í átjánda og þriðja neðsta sæti C-deildarinnar. Hin svæðisskipta D-deild bíður því Paderborn á næsta tímabili.