Flynn hyggst koma gögnum til þingnefndar

Michael Flynn, fyrrverandi þjóðaröryggisráðgjafi Donald Trump Bandaríkjaforseta, hyggst koma hluta af umbeðnum gögnum til nefndar öldungadeildar Bandaríkjaþings sem rannsakar afskipti Rússa af bandarísku forsetakosningunum sem fram fóru á síðasta ári.

AP greindi frá þessu í gærkvöldi, sama dag og lögmaður Trump, Michael Cohen, neitaði þingnefnd fulltrúadeildarinnar um upplýsingar.

Greint var frá því í síðustu viku að Flynn hafi neitað að afhenda þingnefnd gögn í tengslum við rannsóknina. Sagðist hann ætla að nýta sér stjórnarskrárvarin réttindi sín sem tryggja að ekki sé hægt að krefja vitni um að svara ásökunum sem gætu komið sök á hann sjálfan.

Flynn tók við starfi þjóðaröryggisráðgjafa í janúar en lét af störfum í tæpum mánuði síðar eftir að upp komst að hann sagði ósatt um samskipti sín við rússneskan sendiherra í aðdraganda valdaskiptanna.

Leyniþjónustunefnd öldungadeildar Bandaríkjaþings rannsakar nú tengsl starfsmanna kosningabaráttu Trump við Rússland en Flynn var einnig ráðgjafi Trump í aðdraganda forsetakosninganna í Bandaríkjunum síðastliðið haust.