Björn Ingi mátar sig við borgarstjórn

Ýmislegt bendir til þess að nýtt framboð í borginni sé í farvatninu og það verði Björn Ingi Hrafnsson sem muni leiða það.

Eiríkur Jónsson greinir frá því, með sínum hætti, á vef sínum að Björn Ingi Hrafnsson, sé að íhuga það að bjóða sig fram í næstu sveitarstjórnarkosningum sem eru eftir tæpt ár.

Fyrirsögnin er í stíl Eiríks, „Björn í borg?“, en þá er sem afskiptum Eiríks af þeirri frásögn ljúki. Ýmislegt rennir stoðum undir það að þarna sé um annað og meira en vangaveltur að ræða, að hreinlega sé verið að þreifa á kjósendum með fulltingi fjölmiðla. Og í hinu valkvæða linkasafni á Eyjunni, hvar Björn Ingi Hrafnsson er nú orðinn ritstjóri eftir rekstrarvandræði fjölmiðlaveldis hans og vendingar því samfara, er tengt skilmerkilega á þær vangaveltur sem birtast í fréttinni.

Þegar fyrirsögninni sleppir kveður við allt annan tón en þeir þekkja sem lesið hafa fréttir eftir Eirík lengi; allt annan stíl en þann sem má heita einstakur í fjölmiðlasögunni. Þar er sem einhver allt annar haldi um penna.

„Heyrst hefur að í farvatninu sé mögulegt nýtt þverpólitískt framboð í borgarpólitíkinni. Margir eru orðnir langþreyttir á lóðaskorti meirihlutans og baráttu gegn einkabílnum, en minnihluti Sjálfstæðisflokks og framsóknar og flugvallarvina hefur ekki náð vopnum sínum.“

Björn Ingi vekur athygli í þætti um skipulagsmál og lóðaskort

Þannig hefjast vangaveltur sem áhugamenn um pólitík lesa í það eitt að Björn Ingi séu nú að velta fyrir sér möguleikum á endurnýjuðum pólitískum frama. En, eignarhald á vefnum EiríkurJónsson.is er að einhverju leyti í höndum DV, sem tilheyrir Pressu-samstæðunni sem einnig stendur að Eyjunni.

Í pistlinum segir að hugmyndin sé að stofna breiðfylkingu um nokkur einföld atriði „sem stór hluti borgarbúa getur sameinast um, ekki síst þeir sem búa austarlega í borgarlandinu og finnst lítið hafa verið hlustað á sig.“

Og áfram er haldið: „Björn Ingi Hrafnsson, fyrrverandi borgarfulltrúi, vakti mikla athygli á dögunum er hann ræddi skipulagsmál og lóðaskort í borginni í Silfri Egils við Heiðu Kristínu Helgadóttur, einn helsta hugmyndafræðing meirihlutans. Er jafnvel talið að að hann hyggi á framboð.“

Frístundakortið heldur nafni Björns Inga á lofti um ókomna tíð

Menn mega leita lengi á timarit.is áður en þeir rekast á nokkuð í líkingu við svo loðinn véfréttastíl í frétt sem merkt er „–eir“. Sá sem heldur um penna greinir frá því að Björn Ingi hafi sagt „óvænt“ af sér sem borgarfulltrúi í kjölfar innanflokksdeilna í Framsóknarflokknum, eins og það er orðað.

„Hann var formaður borgarráðs þegar Vilhjálmur Þ. Vilhjálmsson var borgarstjóri og einnig þegar Dagur B. Eggertsson varð fyrst borgarstjóri í hundrað daga. Sá meirihluti féll þegar sjálfstæðismenn sóttu Ólaf F. Magnússon úr veikindafríi og gerðu öllum að óvörum að borgarstjóra.

Sama dag og Ólafur tók við sem borgarstjóri reyndu sjálfstæðismenn mikið að fá Björn Inga til að hætta við að segja af sér, en honum varð ekki haggað.

Eitt er það mál sem Björn Ingi barðist fyrir í borgarpólitíkinni og heldur nafni hans á lofti, en það er frístundakortið sem tugþúsundir barna og unglinga hafa nýtt sér á undanförnum árum.“

Þeir sem enn eru að velta fyrir sér hver haldi þarna um penna höggva eftir því að sá þekkir pólitíska sögu Björns Inga í borgarstjórn harla vel.

Telur Björn Inga skrifa um sjálfan sig

Guðfinna Jóh. Guðmundsdóttir, borgarfulltrúi Framsóknar og flugvallarvina í Reykjavík, velkist hvergi í vafa um hver höfundur fréttarinnar á vef Eiríks er, nefnilega téður Björn Ingi, í það minnsta séu skrifin að hans undirlagi. Sem er athyglisvert út af fyrir sig, fyrir alla áhugamenn um pólitíkina í borginni:

„Nei en krúttlegt, Björn Ingi ritstjóri Eyjunnar búinn að setja þessa frétt um sjálfan sig inn á Eyjuna, spurning hvort samkvæmisleiknum sé ekki bara lokið og Björn Ingi og Villi Vill fyrrrverandi borgarstjóri taki þetta ekki bara saman næsta vor,“ skrifar Guðfinna Jóh. og lætur blikkandi broskall fylgja.

En, varla verður hjá því litið að það hlýtur að fara um Framsóknarfólk í borginni ef þar blasir við frekari klofningur en þegar er innan þess flokks.