Spánverjar á mótorhjólum minnast Spánverjavíganna fyrir vestan

Hópur Spánverja á mótorhjólum heimsótti Bolungarvík í dag til að færa bæjarbúum minningarskjöld um ein verstu fjöldamorð sem framin hafa verið á Íslandi. Góður hugur fylgdi þó hópnum en forsprakka hans fannst hann vera kominn heim til sín þegar hann kom á Vestfirðina.

Hópur Spánverja á mótorhjólum kom vestur að Óshólavita í Bolungarvík í dag til að minnast Baskavíganna í október árið 1615, sem voru síðustu og ein verstu fjöldamorð sem framin hafa verið á Íslandi. Hugo Scagnetti forsprakki hópsins afhenti  Guðbjörgu Stefaníu Hafþórsdóttur forseta bæjarstjórnar Bolungarvíkur minningarskjöld um þá sem féllu.

„Við ákváðum að ferðast til Íslands og til Bolungarvíkur því áhugaverð saga tengir Íslendinga og Spánverja. Einn úr okkar hópi kemur frá Baskalandi,“ segir Hugo.

Sumarið 1615 var afar slæmt og firðir á Vestfjörðum ísilagðir langt fram á sumar. En síðsumars komu þrjú basknesk hvalveiðiskip fyrst inn á Patreksfjörð og síðar inn á Þingeyri og Bolungarvík. Í fyrstu voru samskipti heimannanna og Baskanna góð en þegar skipin voru að halda á brott frá Reykjarfirði skall á mikill stormur og skipin strönduðu. Til að gera langa sögu stutta sló í brýnu milli skipbrotsmanna og heimamanna eftir að Baskarnir gerðu sig heimakomna og gæddu sér á harðfiski sem leiddi til þess að um áttatíu Baskar voru myrtir grimmilega í tveimur árásum.

Engir ættingjar þeirra myrtu voru þó í hópnum í dag.

„Nei, enginn úr fjölskyldum þeirra er hér en mörgum Spánverjum finnst þetta vera mjög áhugaverð saga,“ segir Hugo.

Hópnum finnist líka gaman að kynnast íslenskri nútímamenningu en hann lagði af stað hringinn um landið frá Reykjavík suður með landinu fyrir nokkrum dögum.

„Ég kom hingað fyrir 5-6 árum en ég þekki ekki mikið til Vestfjarðanna. Ég kann mjög vel við mig hér því ég er fæddur í Patagóniu hinum megin á jörðinni. Þetta svæði er mjög svipað. Alveg eins og heima,“ sagði Hugo áður en hann hélt brosandi af stað á mótorhjóli sínu með hópnum.