Louise hefur gefið sig fram við lögreglu

Louise Soreda, franska konan sem leitað hefur verið að, gaf sig fram við lögregluna á Suðurlandi laust fyrir hádegi í dag. Hún er heil á húfi og við góða andlega heilsu. Þetta kemur fram í tilkynningu frá lögreglu.

Louise var í för með samlanda sínum þegar hún gaf sig fram. Lögreglu hafði þá tekist að hafa uppi á staðsetningu hennar með því að rekja greiðslukort hennar en hún hafði greitt fyrir þjónustu í fyrradag af ferðaþjónustufyrirtæki sem er með starfsemi í Þórsmörk.

Fram kemur í tilkynningunni að fjölmargar ábendingar hafi borist um ferðir Louis sem bentu til þess að hún væri á ferðalagi um Suðurland. Lýst var eftir henni í gær eftir beiðni frá fjölskyldu hennar sem sögðust óttast um líf hennar, að því er segir í tilkynningunni.