Játar að hafa brotist inn

Karlmaður sem sætir ákæru vegna gruns um að hafa brotist inn í íbúð í Hafnarfirði og áreitt tólf ára stúlku kynferðislega í maí síðastliðnum játaði innbrotið þegar málið var tekið fyrir í Héraðsdómi Reykjaness fyrr í mánuðinum. Hann neitaði hins vegar að hafa brotið á stúlkunni.

Maðurinn er sakaður um að hafa brotist inn á heimili fjölskyldu í Hafnarfirði þann 5. maí síðastliðinn, farið inn í svefnherbergi stúlkunnar og strokið henni um bak, farið undir nærbol hennar og niður á mjöðm. Þá er hann sagður hafa skriðið upp í rúm til stúlkunnar og reynt að strjúka henni meira, en stúlkunni tókst að lokum að læsa sig inni á baðherbergi. Maðurinn var í framhaldinu handtekinn og úrskurðaður í gæsluvarðhald til 2. ágúst næstkomandi. Hann var látinn laus nýverið, en að sögn Kolbrúnar Benediktsdóttur varahéraðssaksóknara voru ekki lengur skilyrði samkvæmt lögum til þess að fara fram á áframhaldandi gæsluvarðhald.

Maðurinn er einnig grunaður um blygðunarsemisbrot en hann er sakaður um að hafa farið upp að baðherbergisglugga þann 4. maí síðastliðinn og horft á konu þar sem hún stóð fáklædd og berbrjósta. Þá var maðurinn grunaður um tvö önnur brot, kynferðisbrot og tilraun til húsbrota, sama dag og hann braust inn til fjölskyldunnar. Hann sætti gæsluvarðhaldi frá handtöku 5. maí. Aðalmeðferð málsins verður þann 28. ágúst næstkomandi.