Stelpurnar okkar eru því miður úr leik á mótinu og hefur heppnin ekki beint verið með þeim í liði í fyrstu tveimur leikjunum gegn Frökkum og Svisslendingum.
Þegar illa gengur getur verið gott að eiga góða að og lendir það oft á mökum að hughreysta íþróttafólkið okkar.
Þegar karlalandsliðið fór á EM í fyrra ræddi Vísir við maka strákanna okkar. Nú er komið að mökum stelpnanna okkar að lýsa sínum konum en það eru sennilega fáir sem þekkja þær betur.
Sumar þeirra eru einhleypar og því miður náðist ekki í alla maka leikmanna landsliðsins en hér að neðan má lesa falleg orð frá strákunum og stelpunum á bakvið stelpurnar okkar.
Fótboltaparið Andri Rúnar og Rakel
Bolvíkingurinn Andri Rúnar Bjarnason, markahæsti leikmaður Pepsi-deildar karla, lýsir sinni konu, Rakel Hönnudóttur, á þennan hátt:„Hún er skemmtileg blanda af algjörum nagla og ljúfmenni. Hún er rosalega góð við alla. Hún er alltaf til í að hjálpa öðrum og gerir það án þess að hika. En svo inni á vellinum myndi hún klára leik fótbrotin ef það þýddi að liðið myndi vinna.“
Með stórt hjarta
Glódís Perla Viggósdóttir er ein af stjörnum mótsins og hefur hún gjörsamlega farið á kostum í íslenska landsliðinu. Kærastinn hennar heitir Kristófer Eggertsson og hann lýsir sinni konu svona:„Hún er hógvær stelpa með stórt hjarta og frábær í alla staði. Með árangurinn í fótboltanum þá er hún gagnrýnin á sig sjálfa og leitar alltaf í að bæta sig.“
Mjög umhugað um náungann
Hafdís Inga Hinriksdóttir og landsliðsmarkvörðurinn Sandra Sigurðardóttir mynda sterka heild og lýsir Hafdís sinni konu á fallegan hátt:„Hún er svakalega samviskusöm, metnaðargjörn og æfir mjög mikið. Hún vill stöðugt bæta sig og leggur mikið á sig. Sandra er frábær liðsfélagi þar sem hún er húmoristi mikill en líka mjög umhugað um náungann. Fyrst og fremst er hún góð manneskja.“
Mjög sterkur karakter
Landsliðsfyrirliðinn Sara Björk Gunnarsdóttir og Alexander Jura eru einstaklega fallegt par. Jura er sjúkraþjálfari hjá Wolfsburg í Þýskalandi þar sem Sara Björk spilar.Blaðamenn Vísis úti í Hollandi heyrðu hljóðið í Jura á stuðningsmannasvæðinu fyrir leikinn gegn Frökkum. Hann lýsir hann Söru svona:
„Hún er með mjög sterkan karakter, vill vinna hvern einasta leik. Það er mikilvægt til að leiða lið og í þeirri stöðu sem hún spilar, á miðjunni.“
Engin hindrun of stór
Jóhannes Karl Sigursteinsson og markadrottningin Harpa Þorsteinsdóttir eru æðislega fallegt par og eiga þau saman þrjú börn. Jóhannes lýsir sinni konu svona:„Harpa hefur ótrúlegan eiginleika til að takast á við verkefni með blöndu af kæruleysi og metnaði á sama tíma. Þannig að í stað þess að mikla þetta fyrir sér og búa til stress sér hún frekar lausnirnar og ræðst á verkið. Fyrir mig virkar þetta einna helst sem hrikalegt skipulagsleysi og yfirleitt held ég að allt sé í rugli þótt sú sé ekki raunin. Hún tæklar fótboltann í raun eins og þannig virðist engin hindrun of stór.“
„Þetta er bara fótbolti sko“
Alexander Freyr Sindrason og Fanndís Friðriksdóttir eru sannkallað fótboltapar en Alexander leikur með Haukum í Inkasso-deildinni hér á landi. Hann er virkilega stoltur af sinni konu:„Eitt af því besta í fari Fanndísar er ákveðnin í henni og hefur það auðvitað hjálpað henni mjög mikið í gegnum fótboltann. Síðan held ég líka að það sem hefur hjálpað henni hvað mest í boltanum er að hún stressar sig ekki mikið á hlutunum. Auðvitað vilja allir vinna og allt það en það sem hún segir oft „þetta er bara fótbolti sko“ og það segir svolítið um hana.“
Með frábæran húmor
Ýmir Már Geirsson og Arna Sif Ásgrímsdóttir þekkja hvort annað vel og lýsir Ýmir sinni konu svona:„Arna Sif er umfram allt hjartahlý og vill öllum vel. Hún er traust og hefur frábæran húmor. Hún er mjög metnaðarfull og ákveðin í því sem hún tekur sér fyrir hendur og hefur gríðarlegt keppnisskap sem hefur nýst henni vel í boltanum.“
Dreymir um að verða bóndakona
Ómar Páll Sigurbjartsson og Dagný Brynjarsdóttir eru sérstaklega fallegt par og þekkir Ómar sína konu mjög vel:„Dagný er einstaklega ákveðin og sjálfsörugg stelpa. Hún veit nákvæmlega hvað hún vill og hún gefst ekki upp fyrr en hún nær sínu fram, hvort sem það eru markmiðin hennar í fótboltanum eða rifrildi okkar á milli um hvað ég á að elda handa henni í kvöldmatinn. Þrátt fyrir ótrúlega hörku á vellinum og endalaust keppnisskap býr innra með henni lítil og ljúf sveitastelpa sem dreymir um að verða bóndakona í Þykkvabænum.“
