Þorsteinn: Ólafía á bara eftir að verða betri

Ólafía Þórunn Kristinsdóttir hefur á morgun leik á opna breska meistaramótinu í golfi en þar mun hún etja kappi við bestu kylfinga heims. Þetta er fjórða risamót ársins í kvennagolfi og verður mótið í beinni útsendingu á Golfstöðinni alla keppnisdaga.

„Ég held að við getum vonast til þess að hún komist í gegnum niðurskurðinn. Ef það tekst kæmi mér ekki á óvart ef við myndum sjá hana á meðal 30 efstu kylfinga,“ sagði Þorsteinn Hallgrímsson í kvöldfréttum Stöðvar 2. Ólafía hefur keppt á einu stórmóti til þessa, PGA-meistaramótinu í Chicago, þar sem hún missti naumlega af niðurskurðinum.

Þorsteinn segir að árangur hennar í Skotlandi um síðustu helgi hafi verið magnaður þar sem hún spilaði frábært golf.

„Það sem hefur helst breyst hjá henni er að hún er komin með svo mikla reynslu. Þegar við hittum hana á PGA-meistarmaótinu í Chicago sáum við að hún fékk enga eðlilega æfingahringi þar sem hún þarf að taka þátt í ýmsum atburðum með styrktaraðilum. Þetta er hún allt að læra núna.“

Þorsteinn reiknar með því að Ólafía þurfi helst að vinna í því að styrkja andlega þáttinn fremur en nokkuð annað.

„Hún er að fá meiri trú á leiknum sínum en vantar aðeins að hún láti aðeins vita meira af sér. En það er að koma.“

Ólafía er sem stendur í 104. sæti peningalista LPGA-mótaraðarinnar en efstu 100 endurnýja þátttökurétt sinn fyrir næstu leiktíð.

„Það er öruggt að hún geri það, ef hún meiðist ekki. Hún hefur allt til þess að bera til að vera toppkylfingur. Hún er að springa út núna og á bara eftir að verða betri.“