Fyrsti þáttur Seinni bylgjunnar í opinni dagskrá í kvöld

Seinni bylgjan, nýr þáttur um Olísdeildirnar í handbolta, hefur göngu sína í kvöld en þá verður hitað upp fyrir tímabilið í Olísdeild karla.

Tómas Þór Þórðarson stýrir þættinum eins og hann mun gera í allan vetur en honum til halds og trausts í kvöld verða tveir af sérfræðingum þáttarins - Jóhann Gunnar Einarsson og Gunnar Berg Viktorsson.

Aðrir sérfræðingar Seinni bylgjunnar eru Sigfús Sigurðsson, Sebastían Alexandersson og Dagur Sigurðsson.

Þátturinn, sem hefst klukkan 20.00 á Stöð 2 Sport, verður sýndur í opinni dagskrá og streymt beint á íþróttavef Vísis.

Í kvöld munu strákarnir taka fyrir öll lið deildarinnar og spá í spilin fyrir veturinn. Birt verður spá þáttarins um gengi liðanna í vetur og rætt við alla þjálfara liða í deildinni.

Á mánudagskvöld klukkan 21.30 verður Seinni bylgjan aftur á ferðinni en þá verður hitað upp fyrir tímabilið í Olísdeild kvenna. Þátturinn verður einnig sýndur í opinni dagskrá og á Vísi.