Tímabundið sölubann á 89 tegundir af þyrilsnældum á Íslandi

Neytendastofa hefur lagt tímabundið bann við sölu og afhendingu á 89 tegundum af þyrilsnældum (fidget spinners) hjá innflytjanda hér á landi. Samkvæmt tilkynningu frá Neytendastofu hefur innflytjandinn ekki enn sýnt fram á að varan sé örugg fyrir börn. Neytendastofa bendir neytendum á að á að oft sé bara hægt aðs já umbúðirnar í verslunum en á umbúðum megi greina hvort leikfang sé í lagi. Þær vísbendingar eru meðal annars CE-merking, tilgreining á framleiðanda, heimilisfang framleiðanda, framleiðslunúmer vöru og tilheyrandi varúðarleiðbeiningar. Samkvæmt Neytendastofu eru líkur á að varan sé ekki í lagi ef slíkar merkingar eru ekki á umbúðum eða vörunni sjálfri. Segir í tilkynningunni að mikið hafi verið um þyrilsnældur sem eru ekki í lagi og geti reynst börnum hættulegar.

„Samkvæmt upplýsingum og ábendingum sem Neytendastofu hafa borist hafa þyrilsnældur brotnað við lítið hnjask og litlir aðskotahlutir hafa losnað frá þeim. Þá hafa fundist þyrilsnældur með beitt blöð, sem auðveldlega gæti skaðað börn að leik. Rafhlöðuhólf í LED þyrilsnældum hafa einnig opnast mjög auðveldlega svo að rafhlaða er aðgengileg sem er sérstaklega hættulegt ungum börnum vegna hættu á að þau stingi rafhlöðum upp í sig.“

Til þess að leikfang fái CE-merkingu þarf að fullnægja þeim kröfum sem hafa verið gerðar til vörunnar vegna heilsu- og öryggisverndar á Íslandi og í öðrum löndum innan Evrópska efnahagssvæðisins. CE-merkingin er yfirlýsing frá framleiðanda og þá þarf að hafa farið fram prófun á leikfanginu, meðal annars um hættu sem af því gæti hlotist og efnainnihaldi þess. Innflytjandinn þarf að tryggja að þessi gögn liggi fyrir svo unnt sé að sýna fram á að heimilt sé að selja leikfangið á Íslandi.

Innflytjandi þyrilsnældanna sem um ræðir hefur nú fjórar vikur til þess að sýna fram á að varan sé í lagi.