Lagði ekki til neinar efnislegar breytingar á stjórnarskránni

Bjarni Benediktsson, forsætisráðherra og formaður Sjálfstæðisflokksins, lagði ekki fram neinar efnislegar breytingar á stjórnarskránni á fundi formanna þeirra flokka sem eiga sæti á Alþingi með forseta þingsins í gær.

Hann lagði hins vegar fram tillögu um verklag fyrir breytingar á stjórnarskránni og hvernig standa skuli að þeim að sögn Loga Más Einarssonar, formanns Samfylkingarinnar.

Hann vill þó að öðru leyti ekki fara nánar út í hvað felst í tillögu Bjarna og kveðst bundinn trúnaði um það en í fréttum RÚV í gærkvöldi kom fram að Bjarni hefði lagt fram minnisblað um að stjórnarskráin yrði endurskoðuð á næstu þremur kjörtímabilum.

Vinnan fari fram á árunum 2017 til 2028 og verði áfangaskipt, það er að ekki verði gerð tilraun til að breyta allri stjórnarskránni í einu. Í tillögunni felst að allir flokkar sem sæti eiga á Alþingi vinni sameiginlega að málinu.

Segir gott að fá eitthvað fram varðandi stjórnarskrána frá Bjarna

Engin niðurstaða liggur fyrir en Logi segir að hann sé ánægður að eitthvað komi frá Bjarna nú. Stjórnarskráin er eitt af nokkrum málum sem koma þarf í ákveðinn farveg fyrir kosningar þar sem endurskoðun á henni átti að hefjast á þessu kjörtímabili sem varð óvænt miklu styttra en menn gerðu ráð fyrir.

„Það er gott að fá eitthvað frá honum því fundur sem hann hélt í vor að hans frumkvæði þá skilaði hann engu frá sér. Þá er rétt að hafa í huga að þeir fimm flokkar sem ræddu mögulega stjórnarmyndun í vetur voru búnir að koma sér saman um ákveðið verklag og það þýðir að það er augnablikinu meirihluti á þingi fyrir slíkri leið. Mér finnst að það hefði þurft að taka meira tillit til hennar,“ segir Logi.

Logi segir að í fimm flokkanna leiðinni felist að stíga ákveðnar til jarðar en Bjarni leggur til.

Mikils vinnandi að menn nái saman um næstu skref

Óttarr Proppé, formaður Bjartrar framtíðar, segir að ekkert hafi verið ákveðið varðandi stjórnarskrána á fundi formannanna í gær annað en að ræða málin frekar.

„Það hefur komið upp að leggja fram einhverja tillögu að verklagi sem menn geti sameinast um. Mér finnst það til mikils vinnandi að menn nái saman um það í það minnsta að menn nái saman um næstu skref. En ég er ekki kominn á þann stað með mínu fólki að vera með skýra afstöðu gagnvart því sem var rætt á fundinum,“ segir Óttarr.

Vilja breytingarákvæði um þjóðaratkvæðagreiðslu inn í stjórnarskrá

Birgitta Jónsdóttir, þingflokksformaður Pírata, segir að Píratar geti ekki fallist á neitt í líkingu við það sem Bjarni lagði til á fundinum í gær án þess að inn komi breytingarákvæði úr nýju stjórnarskránni.

„Það gengur út á það að hægt sé að breyta stjórnarskránni án þess að rjúfa þing. Í staðinn fyrir að rjúfa þing og hafa tvö þing þá er málinu vísað til þjóðarinnar og þjóðaratkvæðagreiðslu. En Bjarni er bara algjörlega á móti þessu. Samt hefur hann samþykkt sambærilegt ákvæði sem var bara með miklum þröskuld og sem var svona sólarlagsákvæði,“ segir Birgitta og bætir við að Píratar séu ekki til umræðu um svona verklag sem tekur langan tíma og byrjar á vitlausum enda að þeirra mati.

„Erfiðasti hlutinn er tekinn fyrst í stað þess að fara til dæmis fyrst í mannréttindamálin. Mér fannst tónninn í Bjarna vera þannig að þeir væru tilbúnir að fara í málþóf fram á kjördag ef að meirihluti þingsins myndi setja breytingarákvæðið á dagskrá. Það væri náttúrulega frábært ef fólk getur komið sér saman um hluti en það verður að vera einhver öryggisventill og hverjir eru besti öryggisventillinn á lýðræðið? Það er auðvitað almenningur og ef hann treystir ekki sama fólkinu og vill að kjósi sig til að fara í þjóðaratkvæðagreiðslu um stjórnarskrárbreytingar þá er eitthvað ekki í lagi.“

Formenn flokkanna funda aftur í dag klukkan 12:30 með Unni Brá Konráðsdóttur, forseta Alþingis. Þá verður staðan tekin á því hvernig málin standa varðandi þingstörfin framundan og þinglok fyrir kosningar. Eftir formannanna á mánudag var ákveðið að kanna hvaða farveg hægt væri að setja ákveðin mál í, þar á meðal lögfestingu NPA, notendastýrðrar persónlegrar aðstoðar fyrir fatlaða, og mögulegar breytingar á útlendingalögum.

Ekki náðist í Bjarna Bendiktsson við vinnslu fréttarinnar.