Reynir að hafa fé af hrekklausum konum á Tinder

„Þessi fallegi maður er/var vafrandi á Tinder. Hann er því miður ekki allur þar sem hann er séður, tókst næstum að plata út úr mér stóra peningaupphæð en það slapp. Langaði bara að vara ykkur við,“ skrifar kona nokkur inn á Facebookhópinn Beauty tips.

Fjallmyndalegur sjarmör með apa á öxl

Með birtir hún mynd af manninum og þar fer greinilega ævintýramaður, fjallmyndalegur á framandi slóðum, með sólgleraugu og apa á öxlinni.

Ekki er hægt að segja að hann sé frumlegur í tilraunum sínum til að hafa fé af þeim konum sem hann kemst í kynni við á stefnumótaforritinu Tinder; reyndar er Nígeríusvindl-bragur á aðferðum hans. Og fastlega má gera ráð fyrir því að myndin sem hann birtir af sér á Tinder sé illa fengin. Vísir fann þó ekki samsvarandi mynd með lauslegri leit á Google.

Í lýsingu á sér sem fylgir segist maðurinn vera einstæður faðir og börnin séu eina fjölskyldan sem hann á en konu sína missti hann, að sögn, fyrir fimm árum. Hjartnæm saga.

Ófrumlegur en sannfærandi svikahrappur

Konan lýsir því nánar hvernig hrappurinn ber sig að við vafasama iðju sína. Hún segist hafa verið kjáni en í stuttu máli þá er „hann mikill sjarmur og vildi senda mér mjög verðmætan pakka til að geyma fyrir sig af því hann mátti ekki hafa svoleiðis þar sem hann „er“. Pakkinn, sem er örugglega ekki til, festist í Tyrklandi og þurfti að borga stórfé til að koma honum áfram ... algjört kjaftæði og það var þar sem ég fór að hugsa en ég var næstum búin að borga svo sannfærandi var hann.“

Eftir að hafa áttað sig á því að þarna væri eitthvað vafasamt á ferðinni og kynnt sér málin sýnist henni þarna um klassískt svindl að ræða.

Fleiri konur taka í sama streng, í umræðu í athugasemdum við þessi varnaðarorð. Önnur segist hafa lent í einum slíkum og þeir séu örugglega fleiri vafasamir á ferð á þessum slóðum. „Borgaði ekki en þeir vita alveg hvað þeir eru að gera. Gott hjá þér að láta vita. Hafði hugsað það saman en fannst ég einmitt svo mikill kjáni.“