Trump þakkar Twitter fyrir forsetastólinn

Donald Trump, forseti Bandaríkjanna, telur ólíklegt að hann væri forseti Bandaríkjanna ef ekki væri fyrir samfélagsmiðilinn Twitter sem hann notar gjarnan til að koma sínum hjartans málum á framfæri.

„Ég efast um að ég væri hér ef það væri ekki fyrir samfélagsmiðla, ef ég á að vera hreinskilinn,“ sagði Trump í viðtali við Sunday Morning Futures á sjónvarpstöðinni Fox News,

Trump er með 41 milljón fylgjanda á Twitter og notar miðilinn óspart, ýmist til þess að tilkynna um stefnu sína sem forseti eða skjóta á þá og það sem honum mislíkar.

Margir hafa gagnrýnt hann fyrir frjálslega notkun hans á samfélagsmiðlinum og segja hana ekki hæfa forseta Bandaríkjanna. Trump segir þó að með Twitter og öðrum samfélagsmiðlum geti hann komið sínum skoðunum á framfæri á fljótlegan og þægilegan hátt.

„Að tísta er eins og að nota ritvél. Þegar ég set eitthvað í loftið setjið þið strax í sjónvarpið,“ sagði Trump við þáttastjórnendur þáttarins.

Þá segir Trump að með Twitter geti hann komið sér hjá því að koma skilaboðum sínum á framfæri í gegnum fjölmiðla sem hann segir ósanngjarna í sinn garð.

„Þegar einhver segir eitthvað um mig get ég séð um það sjálfur. Ef það væri á hinn veginn gæti ég komið mínum sjónarmiðum á framfæri,“ sagði Trump.