Sóttvarnalæknir óttast afleiðingar kynsjúkdóma

Búast má við alvarlegum afleiðingum vegna vaxandi útbreiðslu kynsjúkdóma hér á landi sem ekki hafa sést um árabil. Þetta kemur fram í ritstjórnargrein Þórólfs Guðnasonar sóttvarnalæknis í nýjasta tölublaði Læknablaðsins.

Þórólfur segir í greininni að fyrst megi nefna alvarlegar afleiðingar sárasóttar, til dæmis meðfædda sýkingu. Þá varar hann einnig við því að ein afleiðinganna gæti verið meðfæddar HIV-sýkingar. „Því eru læknar og aðrir heilbrigðisstarfsmenn hvattir til að vera á varðbergi gagnvart þessum sjúkdómum í sínum daglegu störfum,“ skrifar sóttvarnalæknir.

Sú aukning sem Þórólfur nefnir er talsverð. Skrifar hann að fylgst hafi verið með árlegum fjölda einstaklinga sem greinast með sárasótt og/eða lekanda frá árinu 1896, með klamydíu frá 1982, HIV frá 1983 og svo með lifrarbólgu B frá 1985.

Samkvæmt Þórólfi hefur árlegur fjöldi þeirra sem greinist með lekanda aukist árlega frá árinu 2004 og í fyrra hafi 89 greinst með sjúkdóminn. „Í dag eru flestir sem greinast með lekanda karlmenn sem stunda kynlíf með öðrum karlmönnum.“

Sama þróun hefur jafnframt átt sér stað með sárasótt og í fyrra var fjöldi nýgreindra með HIV-sýkingu sá hæsti á einu ári frá því faraldurinn hófst.