Samfélagið tekur höndum saman og safnar fyrir flogaveika ekkju og dóttur hennar

Íbúar í Reykjanesbæ safna nú fyrir flogaveika íslenska konu og 15 ára dóttur hennar sem búsettar eru í Keflavík.

„Ég frétti af þeim þegar ég sá beiðni um mataraðstoð. Ég vildi aðstoða og var þá sett í samband við þessa fjölskyldu. Ég fékk að heyra af sögunni þeirra þannig. Ég styrkti þau til matarkaupa og ætla að aðstoða þau fyrir jólin,“ segir Ásdís Inga Haraldsdóttir sem heldur utan um söfnunina.

„Þau fá enga aðstoð og hún er svo flogaveik. Maðurinn þurfti að hætta að vinna til að sjá um hana og nú er hann fallinn frá.“ Ásdís segir að konan eigi ekki efni á að borga fyrir jarðarförina.

„Hann fékk hjartaáfall og hún segir mér að það hafi bara verið bein afleiðing af því stressi sem þau hafa þurft að búa við undanfarin ár.“

Íbúar í Reykjanesbæ hafa tekið vel í söfnunina og er ljóst að mikil samheldni er í samfélaginu. „Þegar ég frétti af andláti mannsins hennar hafði ég samband. Hún biður aldrei um aðstoð, ég vildi bara bjóða hana. Hún var ótrúlega þakklát fyrir aðstoðina.“

„Hún er flogaveik og er það veik að það þarf að vakta hana allan sólarhringinn. Það er eitthvað sem maðurinn hennar gerði og nú er fjölskyldan hennar frá Reykjavík að skiptast á að vakta hana. Ef hún fær flog fær hún gríðarlega mikla krampa og þarf strax að komast á sjúkrahús. Hún á ekki einu sinni pening fyrir lyfjunum sínum.“

Ásdís segir að söfnunin sé ekki langtímalausn en hjálpi mæðgunum á þessum erfiða tíma. Hún segir að konan geti ekki unnið vegna veikinda sinna en fái ekki nóg fyrir nauðsynjum. „Þetta kerfi er gjörsamlega út úr kú,“ segir Ásdís.

Söfnunarreikningur var stofnaður á kennitölu Ásdísar,  050692-2139, Reikningsnúmer 0565-14-608105.