HM í keilu hafið

Heimsmeistaramótið í keilu hófst í Las Vegas í gær þegar einstaklingskeppni kvenna hófst.

Þetta er í fyrsta skipti sem Ísland sendir bæði karla- og kvennalið saman á HM en sex konur og sex karlar skipa liðið.

Keppt er í einstaklingskeppni, tvímenning, þrímenning og fimm manna liða. Alls er 46 þjóðir sem taka þátt á HM og eru 176 keppendur í kvennaflokki. Nær allir sterkustu keppendur heims eru með á HM.

Aðstæður eru erfiðar en olíuburðurinn á brautunum var útbúinn þannig að keppendur ættu erfitt með að ná háu skori.

Íslensku keppendurnir lentu í erfiðleikum með aðstæðurnar en spilamennska dagsins er góður lærdómur fyrir áframhaldið. Það var Dagný Edda Þórisdóttir sem spilaði best íslensku keppendanna í dag. Hún var með 1062 stig í sex leikjum sem gera 177 í meðaltal. Hún er í 128 sæti.

Í dag hefst einstaklinskeppni karla og verða leiknir sex leikir. Klukkan níu að staðartíma leika Gústaf Smári Björnsson, Gunnar Þór Ásgeirsson, Jón Ingi Ragnarsson og Arnar Davíð Jónsson en kl. 13:40 leika Hafþór Harðarson og Skúli Freyr Jónsson.

Hægt er að fylgjast með framgöngu okkar manna á heimasíðu mótsins.