Trump lætur Theresu May heyra það á Twitter

Donald Trump, forseti Bandaríkjanna, lét Theresu May, forsætisráðherra Bretlands, heyra það á Twitter í gærkvöldi eftir að hún gagnrýndi hann fyrir að dreifa boðskap hægri öfgamanna á samfélagsmiðlinum í gær.

Bandaríkjaforseti endurtísti (e. retweet) myndböndum sem Jayda Fransen, varaformaður breska þjóðernisöfgaflokksins Britain First, hafði deilt á Twitter. Deildi Trump myndböndum sem Fransen sagði sýna múslima eyðileggja styttu af Maríu mey, berja ungling til dauða og ganga í skrokk á ungmenni á hækjum en Bandaríkjaforseti er með 43 milljónir fylgjenda á Twitter.

Talsmaður Theresu May sagði í gær að það hefði verið rangt af Trump að deila þessu efni á Twitter og að breski forsætisráðherrann fordæmdi þessi tíst Bandaríkjaforseta.

Trump beindi síðan spjótum sínum á Twitter gegn May þar sem hann sagði henni að einbeita sér ekki að honum heldur að hryðjuverkastarfsemi í Bretlandi.

„Theresa May, ekki einbeita þér að mér heldur að róttækri hryðjuverkastarfsemi íslamista í Bretlandi. Það er í góðu lagi með okkur!“ tísti Trump í gærkvöldi.

Hvaða áhrif þetta mun hafa á samband leiðtoganna tveggja á enn eftir að koma í ljós en mikil reiði braust út í Bretlandi í gær út af endurtístum Trump á boðskap Britain First. Þannig kölluðu margir eftir því, ekki síst þingmenn Verkamannaflokksins, að boð breskra stjórnvalda um að Trump komi þangað í opinbera heimsókn verði afturkallað. Það hefur ekki verið gert.

.@Theresa_May, don't focus on me, focus on the destructive Radical Islamic Terrorism that is taking place within the United Kingdom. We are doing just fine!

— Donald J. Trump (@realDonaldTrump) November 30, 2017