Hundruð ung­linga hand­teknir í Frakk­landi

Innanríkisráðherra landsins sagði í frönskum fjölmiðlum að þriðjungur skólabarnanna hefði endað í varðhaldi lögreglu. Róstur varð í um fjögur hundruð skólum, en mótmælin hófust í París í síðustu viku og hafa síðan magnast og breiðst út um allt landið.

Í gær kveiktu framhaldsskólanemar í Lille, í norðurhluta Frakklands, í ruslatunnum og köstuðu flöskum, gangstéttarhellum og öðru lauslegu í lögregluna. Lögreglumenn svöruðu með táragasi eftir að mótmælendur skemmdu biðskýli strætisvagna og auglýsingaskilti, eftir því sem fram kemur í frétt Guardian.

„Ekkert réttlætir það að mæta til stofnana til að mótmæla, með grímur, með hulið andlit, vopnuð skotvopnum og bíða eftir íhlutun lögreglu bara til að ráðast á hana,“ segir Laurent Nunez innanríkisráðherra Frakklands. Hann segir að í átökunum í gær hafi saltsýru verið kastað á lögreglumenn í sjö tilvikum. Alls hafi 48 lögreglumenn slasast í átökunum víðs vegar um landið.

Einnig kom til átaka milli barna og lögreglu í Bordeaux, Rennes og Nantes í vesturhluta Frakklands og í Marseille í suðurhlutanum. Við Lamartine-menntaskólann í norðurhluta Parísar veifuðu nemendur skiltum þar sem kvartað var yfir of löngum stundatöflum. Á einu þeirra stóð: „8:00–18:00. Fleiri kennslustundir en svefnstundir.“