Svíar hafa alltaf unnið Íslendinga í fyrsta leik á stórmóti

Íslenska handboltalandsliðið losnaði undan Svíagrýlunni í umspilinu um sæti á HM fyrir rúmum áratug en strákarnir okkar eiga enn eftir að afreka eitt á móti sænska landsliðinu.

Íslensku strákarnir hafa aldrei byrjað stórmót á sigri á sænska landsliðinu. Strákarnir okkar hefja leik á EM í Króatíu í dag þegar liðið mætir einmitt Svíþjóð í fyrsta leik.

Þetta verður í sjötta sinn sem íslenska landsliðið hefur stórmót á leik á móti Svíum en í öll hin fimm skiptin hafa Svíar haft betur. Fyrsti opnunarleikurinn á móti Svíum var á HM í Svíþjóð fyrir tæpum 25 árum.

Svíar hafa unnið þessa fimm leiki með samtals 29 mörkum eða með 5,8 mörkum að meðaltali í leik. Minnsta tapið var þriggja marka tap á HM í Frakklandi 2001 en í hin fjögur skiptin hafa Svíar unnið með fimm mörkum eða meira.

Það sem meira er að íslenska landsliðið hefur lent á vegg í flestum þessara leikja og er aðeins með 19 mörk að meðaltali í þeim.

Evrópumótið fór síðast fram í Króatíu fyrir átján árum síðan og þá mættust einmitt Íslendingar og Svíar í fyrsta leik. Svíar unnu þá átta marka sigur en í þeim leik var Guðjón Valur Sigurðsson, fyrirliði íslenska liðsins í dag, með í för en utan hóps í þessum fyrsta leik.

Leikir á móti Svíum í fyrsta leik á stórmótum:

HM í Svíþjóð 1993

5 marka tap (16-21)

EM í Króatíu 2000

8 marka tap (23-31)

HM í Frakklandi 2001

3 marka tap (21-24)

EM í Noregi 2008

5 marka tap (19-24)

HM í Katar 2015

8 marka tap (16-24)