Tveggja vikna sigling fyrir íslenska HM-fara á Volgu

Til stendur að leigja 300 manna ferju til að sjá stuðningsmönnum karlalandsliðs Íslands í knattspyrnu fyrir gistingu og flutningi á milli leikstaða á heimsmeistaramótinu í knattspyrnu í Rússlandi í sumar.

Hugmyndin kviknaði meðal íslenskra stuðningsmanna sem voru orðnir langþreyttir á að leita að gistingu í Rússlandi og ákváðu að taka málin í eigin hendur.

Páll Kristjánsson lögmaður tilheyrir hópi stuðningsmanna sem hafa verið að skoða gistimöguleika í Rússlandi.

„Einn sentimetri á korti eru svona þúsund kílómetrar,“ segir Páll en steininn hafi tekið úr þegar þeir töldu sig hafa fundið gistingu i nágrannabæ. Í ljós hafi komið að vegalendin frá nágrannabænum á leikstað var á pari við fjarlægðina frá Egilsstöðum til Reykjavíkur.

Leikirnir á skjám

„Einn úr hópnum hafði samband við vin sinn sem búið hefur í Rússlandi og spurði hann hvernig ætti að gera þetta. Sá sagðist vera að skoða að leigja ferju til að sigla á milli leikstaða. Þannig kviknaði hugmyndin.“

Um er að ræða ferjuna Dmitry Furmanov sem tekur um 300 manns. Hægt verður að leigja káetu, lítil herbergi eða lúxusherbergi. Hægt verður að horfa á leikina á HM á skjám um borð í bátnum. Þá er allur matur innifalinn, morgunmatur, hádegismatur og kvöldmatur, auk þess sem drykkir verða á góðum kjörum, óáfengir sem áfengir.

Í lýsingu á káetum skipsins kemur fram að klósett og sturta séu í þeim öllum, loftkæling, ísskápur og sjónvarp.

Stíf sigling til Volgograd

Fyrirkomulagið verður þannig að ferjan verður við akkeri í Moskvu einum til tveimur dögum fyrir leik Íslands og Argentínu þann 16. júní. Þannig hafi fólk aðgang að gistingu fyrir fyrsta leikinn.

Að honum loknum verður látið úr höfn og siglt sem leið liggur suður með Volgu til Volgograd. Þar mætir Ísland Nígeríu þann 22. júní.

„Það verður nokkuð stíf sigling og gefst ekki mikill tími til að stoppa,“ segir Páll. Ferjan verði við akkeri í miðborg Volgograd og eftir þann leik verður svo siglt til Rostov við Don þar sem Ísland mætir Króatíu 26. júní.

„Það er styttri leggur þannig að það verða tækifæri til að stoppa frekar á leiðinni.“

Páll segir unnið að því að bjóða upp á leiguflug frá Íslandi til Moskvu fyrir fyrsta leik og svo heim frá Rostov við Don daginn eftir leikinn gegn Króatíu, 27. júní. Um sé að ræða Boeing vélar í samstarfi við rússneskt flugfélag.

Verið sé að hnýta nokkra lausa enda en Páll og félagar hafa sett í loftið Facebook-síðu þar sem til stendur að svara fyrirspurnum áhugasamra stuðningsmanna. 

Ástæðan fyrir því að þeir vilji kynna möguleikann núna sé sú að frestur til að sækja um miða á leikina í Rússlandi renni út á miðvikudaginn, 31. janúar. Um er að ræða lottó hjá FIFA þar sem kemur í ljós að nokkrum vikum liðnum hverjir fá miða.

„Við eigum eftir að hnýta nokkra lausa enda en viljum koma því á framfæri til fólks að möguleikinn verði til staðar.“

Páll segir endanlegt verð ekki liggja fyrir en á von á því að gisting í meðalkáetu í 12-13 daga, ferðalagið og allur matur innifalinn kosti vel á þriðja hundrað þúsund krónur. Svo bætist við leiguflugið út sem verið sé að ganga frá.

Hann er meðvitaður um að einhverjar efasemdaraddir gætu látið í sér heyra eftir miðasöluvesen á EM í Frakklandi sumarið 2016.

„Það eru allir brenndir eftir ævintýri EM,“ segir Páll og leggur áherslu að menn ætli að skipuleggja ferðina vel og örugglega. Unnið sé að því að afla tilskilinna leyfa og réttinda til að ferðin verði að veruleika.