Nassar dæmdur í 175 ára fangelsi

Larry Nassar, fyrrum læknir bandaríska fimleikasambandsins, var í dag dæmdur til 175 ára fangelsisvistar fyrir kynferðislegt ofbeldi og misnotkun á fjölda stúlkna.

Nassar játaði sekt sína og verjendur hans lögðu til dóm upp á 25-40 ár, í stað þess að fara í gegnum formleg réttarhöld með kviðdómi. Dómarinn, Rosemarie Aquilina, dæmdi Nassar til allt að 40 ára í sjö málum og komst því samtals að 175 ára fangelsisdómi. Fyrr hafði Nassar áður verið dæmdur til 60 ára fyrir önnur brot og hann á því fyrir höndum samtals 235 ára fangelsisdóm.

Dómarinn las upp úr bréfi sem Nassar sendi til réttarins, en þetta bréf varð til þess að hún taldi að hann vissi ekki upp á sig sökina, þrátt fyrir að hafa játað, og hann héldi því fram að hann hefði beitt sér rétt í öllum sínum gjörðum.

„Ég var góður læknir því meðferðir mínar virkuðu og þessir skjólstæðingar mínir sem nú hafa stigið fram eru þeir sömu og hældu mér og komu til mín aftur og aftur,“ stóð í bréfi Nassar.

„Fjölmiðlar sannfærðu þær um að það sem ég gerði var slæmt og rangt. Þeim finnst ég hafa brotið traust sitt.“ Hann endaði svo bréfið á því að nota enska orðatiltækið „Hell hath no fury like a woman scorned,“ sem er líklegast réttast á íslensku sem köld eru kvennaráð.

Dómarinn sagði það augljóst að Nassar iðraðist ekki gjörða sinna og þó hún trúi á endurhæfingu og hafi séð dæmda menn snúa blaðinu við þá sjái hún það ekki gerast í þessu tilfelli og sagði við Nassar: „Ég er búin að skrifa undir dauðadóm þinn.“

„Það var mikill heiður og forréttindi að fá að dæma í þessu máli. Því þú, herra, átt ekki skilið að dvelja fyrir utan veggi fangelsis nokkur tímann aftur,“ sagði dómarinn Rosemarie Aqualina.