„Textinn saminn undir á­hrifum menningar­byltinga síðustu mánaða“

Söngvakeppnin 2018 hefst þann 10. febrúar með fyrra undanúrslitakvöldinu. Þann 17. febrúar fer síðan fram seinna kvöldið. Keppninni lýkur svo með úrslitakeppni í Laugardalshöll þann 3. mars og fer sigurvegarinn fyrir Íslands hönd í Eurovision í Lissabon í maí.

Tólf atriði taka þátt í Söngvakeppninni að þessu sinni og mun Lífið ræða við flytjendur úr hverju atriði. Allir fengu þeir sömu spurningar og sá fyrsti sem stígur á stokk er Dagur Sigurðsson. Dagur mun flytja lagið Í stormi / Saviours eftir Júlí Heiðar Halldórsson þann 17. febrúar.

Hér að neðan er hægt að kynnast Degi betur og söguna á bakvið lagið sjálft:

Af hverju ákvaðst þú að taka þátt?

„Ég ákvað að taka þátt af því mér leist svo vel á lagið og tækifærið. Það hefur verið lítill draumur að fá að prófa að taka þátt í söngvakeppninni. Lagið heillaði mig strax sem og hugmyndirnar sem Júlí hafði að útsetningunni. Þannig að þegar Júlí Heiðar spurði hvort ég væri til þurfti ég ekki að hugsa mig lengi um.“

Af hverju ætti íslenska þjóðin að kjósa ykkur?

„Fólk á bara að kjósa það lag sem því finnst flottast og best flutt.“

Hvert er uppáhalds íslenska Eurovision lagið og af hverju ?

„Ég verð að segja Is it True? Geggjuð ballaða flutt af okkar bestu söngkonu, Jóhönnu Guðrúnu.“

Eftirminnilegasta Eurovison minningin?

„Það tengist einmitt uppáhalds íslenska laginu mínu, Is it True? Ég var semsagt staddur í þrítugsafmæli hjá bróður mínum árið 2009 og sama kvöld var Jóhanna að keppa í úrslitunum. Keppninni var varpað á stórt tjald í afmælinu og ég og hljómsveitin mín vorum að skemmta á eftir. Við vorum búnir að plana að taka lagið ef það færi langt sem það gerði og við töldum í Is it True?“

Hvert er uppáhalds erlenda Eurovision lagið og af hverju?

„Ég ætla að segja Calm After The Storm. Hollenskt folk/kántrý. Gott stöff.“

Lag: Í stormi / Saviours

Höfundur lags: Júlí Heiðar Halldórsson

Höfundar íslensks texta:  Júlí Heiðar Halldórsson og Þórunn Erna Clausen

Höfundar ensks texta:  Júlí Heiðar Halldórsson og Guðmundur Snorri Sigurðarson

Flytjandi:  Dagur Sigurðarson

Um hvað fjallar lagið?

„Lagið fjallar um manneskju sem er að ganga í gegnum breytingar í lífi sínu. Það er einnig baráttusöngur fyrir breytingum og er íslenski textinn saminn undir áhrifum menningarbyltinga síðustu mánaða hér heima og erlendis.“



Hér má hlusta á Í stormi á íslensku

Hér má hlusta á Saviours á ensku