Ekki vænlegt að leysa MeToo umræðuna með skotgrafahernaði

Gestur Pálmason markþjálfi og fyrrum lögreglumaður er einn þeirra sem stendur á bakvið #égertil Facebook hópinn,  en þar er rætt um sjónarhorn þeirra karlmanna sem vilja axla ábyrgð í tengslum við #MeToo.

Gestur sagði í erindi sínu á morgunfundi stjórnmálaflokka um MeToo í dag, að það væri auðvelt að fyllast ógeði á því sem dunið hefur yfir konur, þeim rauða þræði í sögunum sem komið hafa fram í tengslum við MeToo umræðuna. Velti hann upp tveimur spurningum:

„Er hægt að heila hræðilega hluti? Er hægt að snúa þessum hörmungum sem fram eru komnar í afl til góðs?“ Hann telur sjálfur að það sé hægt en til þess hafi verið nauðsynlegt að fá þessar sögur fram.

Aðeins fjórir mættu á fundinn

Hann segir að rétta lausnin sé ekki að setja öll vandamálin í eitt box og týnast í ódýrum og einhliða lausnum.

„Ég tel að sú leið sé ekki til þess fallin að nýta tækifærin sem eru í boði. Hin leiðin er að hafa í raun og veru getuna til að „höndla“ málið af tillitssemi og þroska og þróað okkur þannig í átt að samfélagi sem er fært um að taka þetta samtal án „pólariseringar“ og skotgrafahernaðar.“

Gestur segir að #égertil snúist um að miðla nýjum gildum til drengja, stöðva kynbundið ofbeldi og stöðva þann valdakúltúr þar sem hinn minni máttar sé undir. Það gekk þó ekki vel að safna saman körlum til þess að ræða þetta, á einn fundinn mættu aðeins fjórir. Það sé því ekki leiðin þó að margir hafi áhuga á að vera með í þessu.



Magnað tækifæri

„Við erum bara að reyna að hætta að vera „dicks“ og hætta að kúga helminginn af liðinu sem við erum að hitta í lífinu.“

Hann sagði gríðarlegan ótta meðal karlmanna við að fara inn í þetta samtal, enda mikill sársauki á báða bóga. Mikilvægt væri að hafa í huga að tungumálið skiptir máli í þessu samtali.

„Við stöndum frammi fyrir því magnaða tækifæri sem er að heila samfélagið okkar og mér finnst metnaðarlaust að reyna ekki að heila það allt saman.“

Kerfislægt valdamisrétti

„Þó a sögurnar séu jafn misjafnar og þær eru margar, og misalvarlegar, hafa þær saman sýnt fram á það kerfislæga valdamisrétti sem samfélagið okkar býr við á milli kynjanna,“

sagði Katrín Jakobsdóttir, forsætisráðherra og formaður Vinstrihreyfingarinnar - græns framboðs, þegar hún setti morgunverðarfundinn.

Katrín sagði að það væri í rauninni búið að endurhugsa allt eftir þessa byltingu, nefndi hún þar að það væri hollt og gott að karlar væru búin að leggjast undir feld og hugsa og að konur hefðu horft til baka og áttað sig á því að sum atvik sem þær hefðu orðið fyrir hefðu ekki verið í lagi. Umræðan hafi rækilega vakið athygli á djúpstæðu misræmi í samfélaginu og snortið flesta. Hún sagði jafnframt að stóra spurningin væri, hvað gerum við svo? 

Katrín sagði að stjórnmálaflokkarnir þyrftu að nálgast þessi mál eins og frjáls félagasamtök, mikilvægast sé að flokkarnir þetta saman.

 „Og nýtum líka að við erum ólíkar hreyfingar og við getum lært hvert af öðru í þessum málum.“