Eyþór vildi setjast í stól forsætisráðherra

Dagur B. Eggertsson borgarstjóri hefur birt á Facebooksíðu sína pistil sem lýsir umdeildum atburði sem varð á mánudag og leiddi til þess að hann vísaði Eyþóri Arnalds athafnamanni á dyr í Höfða, eins og hann horfir við sér. En Eyþór hafði mætt óboðinn í fylgd Guðlaugs Þórs Þórðarsonar utanríkisráðherra á samráðsfund sveitarstjórnarmanna og þingmanna Reykjavíkur. Í pistli Dags kemur meðal annars fram að Eyþór hafi ætlað sér sæti forsætisráðherra.

„Í fundarboði kom skýrt fram að um hefðbundinn fund þingmanna Reykjavíkur og borgarfulltrúa í kjördæmaviku væri að ræða. Mér kom því á óvart að Eyþór Arnalds verðandi oddviti Sjálfstæðisflokksins í borgarstjórn skyldi koma til fundarins. Ég heilsaði honum í anddyri hússins og sagði honum hvernig í málinu lagi, fundurinn væri fyrir borgarstjórn og þingmenn en frambjóðendur hefðu ekki verið boðaðir. Ekkert fór á milli mála í þessum samskiptum,“ segir Dagur.

Þá brá svo við að Eyþór gengur í salinn

Hann lýsir því þá að þess hafi verið beðið í nokkrar mínútur eftir að allir fundarmenn skiluðu sér, „og þegar forsætisráðherra var komin í hús bauð ég fundargestum að setjast við langborð. Ég sat fyrir miðju borðsins öðrum megin með Halldór Halldórsson oddvita Sjálfstæðisflokksins í borgarstjórn við hlið mér, en Guðlaug Þór utanríkisráðherra á móti mér.

Þá brá svo við [að] Eyþór gengur í salinn og býst til að setjast í auða sætið við hlið Guðlaugs, sem ætlað hafði verið fyrir forsætisráðherra.“

Dagur segist hafa gert athugasemd við þetta og ítrekað hvers eðlis fundurinn væri; „hverjum hefði verið til hans boðið og að ég væri viss um að Vigdís Hauksdóttir hefði líka verið til í að sitja fundinn en hann hefði ekki verið ætlaður frambjóðendum. Ef áhugi væri á slíkum fundi þyrfti að boða hann sérstaklega. Eyþór vék við svo búið af fundinum, forsætisráðherra tók sæti sitt en utanríkisráðherra upplýsti að hann hefði boðið Eyþóri. Voru ekki höfð uppi mikið fleiri orð um þetta atvik þótt sérstakt hafi verið.“

Létt yfir mannskapnum

Dagur vitnar til Staksteinaskrifa Morgunblaðsins í morgun, sem borgarstjóri telur afbökun og tilraun til að leggja atburði út á versta veg. „Kemur það ekki á óvart. Verður blaðið og ritstjórn þess að eiga það við sig og sína lund. Af Höfðafundinum er hins vegar það að segja að það var óvenju létt yfir honum og umræður málefnalegar. Bæði þingmenn og borgarfulltrúar voru sammála um að hann hefði verið hinn gagnlegasti og ráðgera frekari fundi um einstaka málaflokka á næstu vikum.“

Staksteinar móðgaðir fyrir hönd Eyþórs

Staksteinaskrifin sem Dagur vísar til, líkast til skrifuð af fyrrverandi borgarstjóra Davíð Oddsyni, lýsa því að Dagur hafi fulla ástæðu til að óttast um stöðu sína.

„Hvers vegna ætli borgarstjóri hafi vísað oddvita stærsta stjórnarandstöðuflokksins af samráðsfundi sveitarstjórnarmanna og þingmanna Reykjavíkur? Var það gert í þágu samræðustjórnmálanna? Var það gert til að auka skilning þingmanna á þörfum Reykjavíkur? Var það‘ gert til að styrkja stöðu Reykjavíkur? Var það gert, eins og borgarstjóri heldur fram, vegna þess að oddvitinn á ekki enn sæti í borgarstjórn? Nei, ekkert af þessu getur átt við, Dagur veit, líkt og allir aðrir að oddvitinn leiðir borgarstjórnarflokk Sjálfstæðisflokksins og er á leið í borgarstjórn.“