Hætti í sumar en gæti snúið aftur á völlinn með þýsku ljónunum

Kim Ekdahl du Rietz er sagður í þýskum fjölmiðlum á leið aftur í lið Rhein-Neckar Löwen þar í landi. Handball-World.com greinir frá því

Hinn sænski Ekdahl du Rietz kom mörgum í opna skjöldu þegar hann tilkynnti að hann myndi hætta að spila handbolta þegar samningur hans við Löwen myndi renna út í lok síðasta tímabils. Hann væri einfaldlega búinn að fá nóg af íþróttinni.

„Ég hef hugsað þetta í mörg ár og ekki fundið skýrari svör. Ég verð bara að taka þessu eins og það er. Ég nýt þess ekki að spila handbolta og ég er að bregðast við því,“ sagði hann í samtali við íþróttadeild í ítarlegu viðtali um ákvörðun sína fyrir rúmu ári síðan.

Sjá einnig: Fer hamingjusamur inn í óvissuna

Löwen hefur ekki viljað staðfesta tíðindin en hefur boðað til blaðamannafundar á föstudag. Talið er líklegt að Löwen hafi viljað fá Ekdahl du Rietz til að fylla í skarð varnarmannsins öfluga Gedeon Guardiola sem er meiddur.

Í viðtali við Handball-World.com í lok janúar sagðist Ekdahl du Rietz hafa notið þess að vera í fríi frá handboltanum. Hann búi í Lund í Svíþjóð en ferðist mikið. Hann sé þar að auki ekki kominn í nýja vinnu en hafi verið mikið á flakki í Evrópu til að heimsækja vinafólk.

Svo virðist hins vegar vera að áhuginn á íþróttinni hafi aukist eftir að hann hætti að spila handbolta. Hann sagðist að minnsta kosti hafa lesið fleiri handboltafréttir eftir að hann hætti en hann gerði nokkru sinni á meðan hann spilaði sjálfur.

Rhein-Neckar Löwen er í öðru sæti þýsku deildarinnar með 34 stig, einu minna en Hannover-Burgdorf sem á þar að auki leik til góða. Liðið er í fjórða sæti A-riðils Meistaradeildar Evrópu en með því leika Guðjón Valur sigurðsson og Alexander Petersson.