Ósátt við tafir í veggjatítluhúsi

„Við viljum bara lausn á okkar máli. Ég vil ekki vera að standa í pólitískum leik,“ segir Anna Gyða Pétursdóttir, eigandi húss í Hafnarfirði sem undirlagt er veggjatítlum.

Eins og fram kom í Fréttablaðinu í gær vill skipulagssvið Hafnarfjarðar að óháðir aðilar meti hvort hús Önnu og manns hennar á Austurgötu 36 er í raun svo skemmt að eina lausnin sé að rífa það og byggja nýtt eins og sérfræðingar þeirra segja.

Sjá einnig: Trúa ekki dauðadómi yfir veggjatítluhúsi í Firðinum

Anna sagðist í samtali við frettabladid.is í gær hafa fundað með embættismönnum bæjarins fyrir viku. „Við áttum tveggja tíma fund þar sem alltaf var talað um „uppbygginguna“. Það að bærinn vilji fá annað mat núna kemur því mjög á óvart.“