Hin­rik prins jarð­sunginn í dag

Útför Hinriks prins fer fram í dag frá kirkju Kristjánsborgarhallar. Lík Hinriks verður brennt og verður helmingi öskunnar dreift í dönskum vötnum og hinum helmingnum komið fyrir í einkagarði konungsfjölskyldunnar við Fredensborgarhöll.

Athöfnin hefst klukkan 11 að dönskum tíma. Tíu liðsmenn konunglegu lífvarðasveitarinnar munu bera kistu Hinriks og þrír kórar munu syngja við athöfnina. Að útförinni lokinni verður sérstök athöfn í Amalíuborg fyrir nánustu ættingja og vini dönsku konungsfjölskyldunnar.

Hinrik Prins lést þann 13. febrúar síðastliðinn, 83 ára að aldri. Margrét Þórhildur, Danadrottning og eiginkona Hinriks, var hjá honum þegar hann lést ásamt sonum þeirra, Friðriki krónprins og Jóakim prins. 

Fjölmargir hafa lagt blóm við konungshallirnar í Danmörku síðan Hinrik lést. Öll þau blóm sem fólk hefur lagt í minningu hans verða færð að minnisvarða um hermenn sem fallið hafa í stríði.

Síðasta sumar greindi prinsinn frá því að hann vildi ekki hvíla við hlið eiginkonu sinnar í dómkirkjunni í Hróarskeldu að þeim gengnum líkt og gert hafði verið ráð fyrir.