Stal kreditkorti foreldra sinna og ferðaðist einsamall til Balí

Tólf ára ástralskur drengur stal kreditkorti foreldra sinna, plataði ömmu sína í að afhenda honum vegabréfið sitt og ferðaðist síðan einsamall til Bali.

Drengurinn, sem kallaður er Drew í umfjöllun ástralska fréttaskýringaþáttarins A Current Affair, er sagður hafa rifist við foreldra sína, sem tjáðu honum að hann mætti ekki fara til Bali, sama hvað hann tautaði.

Þá tók hann til sinna ráða og nappaði kreditkorti foreldra sinna. Því næst fór hann á netið og fann út úr því hvaða flugfélög leyfðu 12 ára börnum að fljúga ein. Svo keypti hann flugmiðana með kreditkortinu og bókaði sig inn á hótelbergi á Bali.

Í stað þess að fara í skólann morguninn eftir settist Drew upp á rafmagnshjólið sitt og brunaði á næstu lestarstöð. Þaðan ferðaðist hann á flugvöllinn og skráði sig sjálfur inn í flugið sem flutti hann til Perth og í tengiflugið sem fór með hann alla leið til Indónesíu.

Aðeins einu sinni á leiðinni var hann spurður út í ferðalagið sitt. Það gerði flugvallastarfsmaður í Perth sem vildi vita hvort hann væri raunverulega 12 ára gamall. Útibú Guardian í Ástralíu hefur fengið það staðfest að jú, hinn 12 ára gamli Drew komst í alvöru einn og óstuddur til Bali.

Í samtali við A Current Affair segir Drew að ferðalagið hafi verið frábært, hann hafi í raun alltaf dreymt um að lenda í ævintýri.

Þegar hann var kominn til Bali fór hann rakleiðis á hótelið þar sem hann tjáði starfsfólkinu að hann væri að bíða eftir systur sinni.

Eftir að skóli Drew sagði foreldrum hans að hann hafi ekki mætt þann morguninn komust þeir fljótt að því að drengurinn hafi notað kortið þeirra. Því ákvað móðir hans að hoppa upp í næstu vél til Indonesíu og ná í drenginn.

Í samtali við A Current Affair segir móðir hans, sem sögð er heita Emma, að drengurinn eigi erfitt með að fá neitun. Því hafi hann brugðist ókvæða við þegar foreldrar hans tjáðu honum að þau væru ekki á leiðinni til Bali á næstunni.

„Lost, ógleði. Það er engin tilfinning sem lýsir því nógu vel hvernig okkur leið þegar við komust að því að hann væri stunginn af,“ segir Emma.